वेंगुर्ला
वेंगुर्ला तालुक्यातील आसोली गावचे ग्रामदैवत आणि जागृत देवस्थान श्री देव नारायणाचा वार्षिक अखंड हरिनाम भागवत सप्ताह सोमवारपासून सुरू झाला आहे. रविवारी ७ रोजी भाद्रपद पौर्णिमेला श्रींची दिंडी व सोमवार ८ रोजी दहीकाल्याने सप्ताहाची सांगता होणार आहे. दरवर्षी सप्ताह कालावधीत आसोली दशक्रोशीतील आरवली, सोन्सुरे, मोचेमाड, अणसूर, उभादांडा, तुळस, मातोंड, शिरोडा, आजगाव, फणसखोल, रेडी, सखैलेखोल, सागरतीर्थ, टांक येथील भजनी मंडळे आपापली भजने सादर करतात. यावेळी श्री देव नारायण मंदिर व मंदिर परिसरात आकर्षक विद्युत रोषणाई करण्यात आली आहे. दशक्रोशीतील भाविकांनी श्रींच्या दर्शनाचा लाभ घ्यावा, असे आवाहन समस्त गावकर, मानकरी, श्री देव नारायण देवस्थान कमिटी व आसोली ग्रामस्थ यांनी केले आहे.
