ऑनलाईन टीम / तरुण भारत :
राष्ट्रवादीचे नेते अजित पवार आज उपमुख्यमंत्रीपदाची शपथ घेण्याची शक्यता आहे. देवगिरी निवासस्थानी झालेल्या बैठकीनंतर अजित पवार आपल्या समर्थक आमदारांसह राजभवनात दाखल झाले आहेत.
उपमुख्यमंत्री देवेंद्र फडणवीस, चंद्रशेखर बावनकुळे, सुधीर मुनगंटीवार यांच्यासह अन्य काही भाजप नेते राजभवनात दाखल झाले आहेत. दुसरीकडे मुख्यमंत्री एकनाथ शिंदे हे देखील राजभवनाच्या दिशेने रवाना झाले आहेत. अजित पवार यांच्याकडे पक्षातील 25 आमदारांच्या समर्थनाचे पत्र असून, राजभवनात शपथविधीची जय्यत तयारी सुरू आहे.
अजित पवारांनी आज आपल्या देवगिरी बंगल्यावर आमदारांची तातडीने बैठक बोलावली होती. बैठकीत राष्ट्रवादीच्या प्रदेशाध्यक्षपदावर महत्त्वाची चर्चा होणार होती. राष्ट्रवादी काँग्रेसचे राष्ट्रीय अध्यक्ष प्रफुल्ल पटेल, सुप्रिया सुळे, नेते छगन भुजबळ, धनंजय मुंडे, हसन मुश्रीफ आदी नेतेही देवगिरीवर हजर होते. 1 जुलैपर्यंत आपल्याला प्रदेशाध्यक्षपद द्यावे अशी अजित पवारांची मागणी होती. त्यासाठी त्यांनी शरद पवारांना अल्टीमेटम दिला होता. मात्र, त्यांनी दिलेला अल्टीमेटम शरद पवारांनी न पाळल्याने अजित पवारांनी वेगळा निर्णय घेतल्याचे समजते.
