गोकुळ शिरगाव/वार्ताहर
अलमट्टी धरणाची उंची वाढविण्यास स्वाभिमानी शेतकरी संघटनेचा विरोध असून शेतकरी संघटना आक्रमकतेच्या पवित्र्यात आहे. कर्नाटक राज्याचे मुख्यमंत्री बसवराज बोम्माई हे कोल्हापुरातील सिद्धगिरी मठावरील कार्यक्रमासाठी उजळाईवाडी कोल्हापूर विमानतळावर आले असता शेतकरी संघटनेच्या पदाधिकाऱ्यांनी कर्नाटकच्या मुख्यमंत्र्यांना निवेदन देऊन आपली भूमिका मांडली. यामुळे कर्नाटक-महाराष्ट्र सीमावाद एकीकडे न्यायालयीन कक्षेत असताना अलमट्टी धरणाच्या उंचीचा वाद पुन्हा पेटण्याची चिन्हे असून कोल्हापूर जिल्ह्यातील शिरोळसह सांगली जिल्ह्याला याचा फटका बसणार आहे.
स्वाभिमानी शेतकरी संघटनेच्या कोल्हापूर जिल्हा वतीने उजळाईवाडी विमानतळावर कर्नाटक राज्याचे मुख्यमंत्री यांना निवेदन देऊन तोडगा काढण्यासाठी विनंती केली आहे. यावेळी नेत्यांकडून धरणाच्या उंचीला विरोध दर्शविण्यात आला आहे. अलमट्टी धरणाची पाणी पातळी ५१२ ठेवावी, अशी मागणी वारंवार केली जाते. याबाबत माजी खासदार राजू शेट्टी यांनी यापूर्वी कर्नाटकच्या मुख्यमंत्र्यांकडे केली आहे.
अलमट्टी धरणाच्या भिंतीची उंची वाढवण्याचा घाट कर्नाटक सरकारने घातला आहे. पाच मीटरने उंची वाढवल्यानंतर अलमट्टीची पाणी पातळी थेट शिरोळ बंधा-यापर्यंत पोहोचणार असल्याचा दावा या क्षेत्रातील तज्ञ करत आहेत. यामुळे कोल्हापूर आणि सांगली जिल्ह्यातून कर्नाटकात जाणाऱ्या नद्यांमधले पाणी पुढे सरकणार नाही. पावसाळ्यात ही दोन्ही शहरं जलमय होऊ शकतात. तर शिरोळ तालुक्यातील साडेपाच ते सहा हजार एकर जमीन नापीक बनण्याचा धोका आहे. त्यामुळे अलमट्टीच्या उंचीला महाराष्ट्रातील नेत्यांकडून विरोध सुरू झाला आहे. हा वाद पुढं आणखी तापण्याची चिन्हं आहेत.
यावेळी स्वाभिमानी शेतकरी संघटना राजसचिव हे म्हणाले की, अलमट्टी धरणाची उंची वाढवली तर महाराष्ट्रातील कोल्हापूर, सांगली जिल्ह्यात व कर्नाटक राज्यातील बेळगाव बागलकोट जिल्ह्यातील शेतकऱ्याचे नुकसान होणार आहे.
स्वाभिमानी शेतकरी संघटनेचे प्रदेशध्यक्ष प्रा. जालिंदर पाटील म्हणाले की, अलमट्टी धरणाच्या उची वाढविण्यास शेतकरी संघटनेच्या वतीने मुख्यमंत्र्यांना निवेदन देण्यात आले आहे. तर एफ अर पी चा दोनशे रुपये चा हप्ता मिळण्यासाठी त्याच्यांकडे निवेदन देऊन मागणी केली आहे.
अनिल मदनाईक म्हणाले की, अलमट्टी धरणाच्या फुगवट्यामुळे शिरोळ तालुक्यातील शेतीचे जनावराचे नुकसान झाले आहे. ही नुकसान भरपाई अजूनही मिळालेली नाही.
