वृत्तसंस्था/ हंबनटोटा
मंगळवारी येथे सुरू असलेल्या दिवस-रात्रीच्या पहिल्या वनडे सामन्यात अफगाणने पाकिस्तानला 47.1 षटकात 201 धावावर रोखले. या सामन्यात इमाम उल हकने शानदार अर्धशतक झळकवले. अफगाणच्या मुजीब उर रेहमान, मोहमद नबी आणि रशिद खान यांनी प्रभावी गोलंदाजी केली.
या सामन्यात पाकने नाणेफेक जिंकून प्रथम फलंदाजी करण्याचा निर्णय घेतला. अफगाणच्या गोलंदाजांनी भेदक गोलंदाजी करून पाकचे सलामीचे दोन फलंदाज लवकर बाद केले. पहिल्याच षटकातील चौथ्या चेंडूवर फरुकीने पाकच्या फक्र झमानला 2 धावावर झेलबाद केले. अफगाणच्या मुजीब उर रेहमानने डावातील दुसऱ्या षटकात कर्णधार बाबर आझमला खाते उघडण्यापूर्वी पायचित केले. मुजीब उर रेहमानने पाकला आणखी एक धक्का देताना मोहमद रिझवनाला पायचित केले. त्याने 22 चेंडूत 4 चौकारासह 21 धावा जमवल्या. रशिद खानने आगा सलमानला 7 धावावर बाद केले. पाकची यावेळी स्थिती 4 बाद 62 अशी होती. इमाम उल हक आणि इफ्तिकार अहमद यांनी पाचव्या गड्यासाठी 50 धावांची भागीदारी केली. मोहमद नबीने इफ्तिकारला झेलबाद केले. त्याने 2 चौकारासह 30 धावा जमवल्या. इफ्तिकार बाद झाल्यानंतर इमाम उल हक आणि शदाब खान यांनी सहाव्या गड्यासाठी 40 धावांची भर घातली. मोहमद नबीने इमाम उल हकला झेलबाद केले. त्याने 2 चौकारासह 61 धावा जमवल्या. शदाब खानने 3 चौकारासह 39 धावांचे योगदान दिले. नसीम शहाने 2 चौकारासह नाबाद 18 धावा जमवल्dया. पाकचा डाव 47.1 षटकात 201 धावात आटोपला. पाकच्या डावात 13 चौकार नोंदवले गेले. पाकने पहिल्या पॉवर प्ले दरम्यानच्या 10 षटकात 46 धावा जमवताना 3 गडी गमवले. अफगाणतर्फे मुजीब उर रेहमानने 33 धावात 3 तर मोहमद नबी, रशीद खान यांनी प्रत्येकी दोन तसेच फरुकी आणि रेहमत शहा यांनी प्रत्येकी एक गडी बाद केला.
संक्षिप्त धावफलक : पाक 47.1 षटकात सर्वबाद 201 (इमाम उल हक 61, मोहमद रिझवान 21, इफ्तिकार अहमद 30, शदाब खान 39, नसीम शहा नाबाद 18, अवांतर 18, मुजीब उर रेहमान 3-33, नबी 2-34, रशिद खान 2-42, फरुकी 1-51, रेहमत शहा 1-6).
