अॅड.येळ्ळूरकर, कोंडुस्कर आज शक्तिप्रदर्शनाने अर्ज दाखल करणार

बेळगाव : बेळगाव उत्तर मतदारसंघातील महाराष्ट्र एकीकरण समितीचे अधिकृत उमेदवार अॅड. अमर येळ्ळूरकर व दक्षिण मतदारसंघाचे अधिकृत उमेदवार रमाकांत कोंडुस्कर हे गुरुवार दि. 20 रोजी आपले उमेदवारी अर्ज दाखल करणार आहेत. सकाळी 10 वाजता  म. ए. समितीच्या कार्यकर्त्यांनी मोठ्या संख्येने उपस्थित रहावे, असे आवाहन करण्यात आले आहे. अॅड. अमर येळ्ळूरकर हे चव्हाट गल्ली येथील क्रांतीसिंह नाना पाटील चौकापासून पी. बी. रोड व तेथून आरटीओ सर्कलमार्गे महानगरपालिकेपर्यंत शक्तिप्रदर्शन करून आपला अर्ज दाखल करणार आहेत. रमाकांत कोंडुस्कर हे डॉ. बाबासाहेब आंबेडकर उद्यानापासून चन्नम्मा सर्कल, डीसी ऑफिस रस्ता, संगोळ्ळी रायाण्णा सर्कल, एसपी ऑफिस रस्त्यावरून शक्तिप्रदर्शनाने महानगरपालिकेत अर्ज भरणार आहेत. उत्तर व दक्षिण मतदारसंघांमध्ये यावेळी म. ए. समितीचा झेंडा फडकविण्याचा निर्धार सर्वच कार्यकर्त्यांनी केला असून त्यांना उत्स्फूर्त प्रतिसाद मिळू लागला आहे. सीमाबांधवांची एकजूट दाखविण्यासाठी आजी-माजी नगरसेवक, लोकप्रतिनिधी, महिला आघाडी, युवक व नागरिकांनी मोठ्या संख्येने भगव्या टोप्या, शाली परिधान करून सहभागी होण्याचे आवाहन करण्यात आले आहे.