बी. व्ही. बेल्लद लॉ कॉलेजमध्ये ‘अधिनियम दर्शन’ प्रदर्शन

बेळगाव : आजच्या तरुणांना भारतीय संविधान आणि कायद्याची जाणीव करून देणे गरजेचे आहे. प्रत्येक भारतीयाला कायद्याविषयीची प्राथमिक माहिती असणे महत्त्वाचे आहे. विद्यार्थ्यांना सहजगत्या कायद्याची माहिती मिळेल तसेच आजवरचे ऐतिहासिक निकाल यांचे माहिती प्रकल्प व लिखित रुपात देण्यात आल्याने बी. व्ही. बेल्लद लॉ कॉलेजच्या विद्यार्थ्यांचे कार्य कौतुकास्पद आहे, असे विचार ज्येष्ठ वकील एस. बी. शेख यांनी व्यक्त केले. केएलई बी. व्ही. बेल्लद लॉ कॉलेजच्यावतीने आयोजित केलेल्या ‘अधिनियम दर्शन’ या कायदाविषयक प्रदर्शनाच्या उद्घाटनप्रसंगी अॅड. एस. बी. शेख बोलत होते. व्यासपीठावर बी. व्ही. बेल्लद लॉ कॉलेजचे चेअरमन आर. बी. बेल्लद उपस्थित होते. प्राचार्य डॉ. बी. जयसिंहा म्हणाले, भारतीय राज्यघटनेची रचना, देशातील महत्त्वाचे निकाल याची माहिती विद्यार्थ्यांना सहजगत्या मिळावी, यासाठी प्रदर्शन आयोजित करण्यात आले होते. महिलांवर होणारे अत्याचार व हिंसाचार रोखण्याचे पैलू, राष्ट्रीय आणीबाणी विधेयक, रामजन्मभूमी प्रकरण, केशवानंद प्रकरण, सर्वोच्च न्यायालयाची व्याप्ती याविषयी सखोल माहिती प्रदर्शनात देण्यात आल्याचे त्यांनी सांगितले. प्रा. डॉ. राजश्री पाटील यांनी सूत्रसंचालन केले. यावेळी डॉ. उमा हिरेमठ, डॉ. ज्योती हिरेमठ, प्रा. सविता पट्टणशेट्टी, प्रा. एम. एस. अलप्पन्नवर, डॉ. एस. सी. पालगोंड, अश्विनी हिरेमठ, डॉ. सुप्रिया स्वामी, डॉ. संजीव कोशावर यासह इतर उपस्थित होते.