अभिनेत्री वंदना गुप्ते यांची अन्नोत्सवला भेट

बेळगाव : रोटरी क्लब बेळगाव आयोजित अन्नोत्सवाला रविवारी मराठी अभिनेत्री वंदना गुप्ते यांनी भेट दिली. अन्नोत्सवाचे स्वरुप पाहून त्या प्रफुल्लित झाल्या आणि आपण एक उत्तम खवय्ये असून पुढच्या वर्षी अन्नोत्सवातील पदार्थांची चव चाखण्यासाठी येणार, असे त्यांनी जाहीर केले. याप्रसंगी माजी प्रांतपाल अविनाश पोतदार उपस्थित होते. रविवारी अन्नोत्सवमध्ये फॅशन शो झाला. ‘ग्लिटर’ या नावाने झालेल्या या फॅशन शोमध्ये सहभागी स्पर्धकांनी निर्मिती, नाविन्य आणि स्टाईल यांचे अनोखे प्रदर्शन करून टाळ्या मिळविल्या. मंगळवार दि. 7 रोजी अन्नोत्सवमध्ये ‘मिस बेळगावी’ ही स्पर्धा होणार आहे. अंतिम फेरीसाठी निवडल्या गेलेल्या स्पर्धकांना अनेक कठीण फेऱ्यांमधून पुढे जावे लागले. त्यांच्यासाठी कार्यशाळा आणि प्रशिक्षण शिबिरही घेण्यात आले. मंगळवारी संध्याकाळी अंतिम फेरीवेळी त्या आपल्या कलाकौशल्याचे प्रदर्शन करतील. शिवाय परीक्षकांच्या प्रश्नांनाही सामोऱ्या जातील. या स्पर्धेच्या परीक्षक म्हणून मिस इंडिया ग्लोब अनुराधा गर्ग, फेमिना मिस इंडियाच्या अंतिम स्पर्धेत पोहोचलेल्या फाल्गुनी खन्ना व मॉडेल निधी कोसंदल उपस्थित राहणार आहेत.