खेळ पैठणीचा ,फुगडी स्पर्धा , भजन स्पर्धा ,तसेच ऑर्केस्ट्रा कार्यक्रम होणार
अभिनेते दिगंबर नाईक खास उपस्थिती लावणार
सावंतवाडी : प्रतिनिधी
सावंतवाडी नगरपालिकेतील इंदिरा गांधी व्यापारी संकुलात उभारण्यात आलेल्या सार्वजनिक गणेशोत्सवात सावंतवाडी नगरपालिकेतर्फे व इंदिरा गांधी व्यापारी संकुल, संत गाडगेबाबा भाजी मंडई ,राष्ट्रीय एकात्मिक सांस्कृतिक कला क्रीडा मंडळ यांच्या संयुक्त विद्यमाने 24 ते 28 सप्टेंबर या कालावधीत विविध भरगच्च कार्यक्रमाचे आयोजन करण्यात आले आहे. सकाळी दहा वाजल्यापासून रात्री दहा वाजेपर्यंत विविध कार्यक्रम होणार आहेत. खास महिला मंडळांसाठी खेळ पैठणीचा व फुगडी स्पर्धा तसेच भजन स्पर्धा ,ऑर्केस्ट्रा आदी कार्यक्रमांचे आयोजन करण्यात आले आहे. या कार्यक्रमाला अभिनेते दिगंबर नाईक खास उपस्थिती लावणार आहेत. सावंतवाडी नगरपालिकेच्या सार्वजनिक गणेशोत्सव मंडळाच्या ठिकाणी कार्यक्रमाच्या नियोजनासंदर्भात काल राज्याचे शालेय शिक्षण मंत्री दीपक केसरकर यांनी सावंतवाडी नगरपालिकेच्या लोकमान्य टिळक सभागृहात व्यापाऱ्यांची बैठक घेतली. या बैठकीत यंदा सार्वजनिक गणेशोत्सव मंडळाच्या ठिकाणी गणपती उत्सवाच्या सहाव्या दिवसापासून विसर्जन पर्यंत म्हणजे अनंत चतुर्थी पर्यंत विविध कार्यक्रम करण्याबाबत त्यांनी सूचित केले . त्यानुसार कार्यक्रमाचे नियोजनही करण्यात आले. सावंतवाडी शहरातील प्रत्येक वॉर्डनिहाय महिलांची खेळ पैठणी व फुगडी स्पर्धा प्रत्येकी दोन दिवस दुपारी तीन ते पाच या वेळेत घेण्यात येणार आहे. महिलांच्या खेळ पैठणी स्पर्धेमध्ये विजेत्या पैठणीला आकर्षक बक्षीस व पैठणी दिली जाणार आहे. तसेच सहभाग घेतलेल्या महिलांना भेटवस्तू दिली जाणार आहे. तसेच महिलांची फुगडी स्पर्धा होणार आहे. सकाळी दहा वाजता आरती ,त्यानंतर दुपारी तीन ते पाच महिलांचे कार्यक्रम सायंकाळी पाच ते आठ भजन स्पर्धा, रात्री आठ वाजता आरती आणि नऊ ते रात्रीपर्यंत ऑर्केस्ट्रा आदी कार्यक्रम होणार आहेत. तरी या स्पर्धेमध्ये प्रत्येक प्रभागातील महिला व आदींनी सहभाग घ्यावा असे आवाहन करण्यात आले आहे. कार्यक्रम नियोजन बैठकीत राज्याचे शालेय शिक्षण मंत्री दीपक केसरकर यांनी यंदा सार्वजनिक गणेशोत्सव मंडळाच्या ठिकाणी सर्व धर्म एकात्मताचे प्रतीक असलेल्या या गणपतीकडे विविध कार्यक्रम करून आपण यंदा आगळ्यावेगळ्या पद्धतीत गणपती उत्सव साजरा करूया त्यासाठी प्रत्येक प्रभागातील महिलांचा सहभाग आवश्यक आहे. त्यासाठी महिलांची खेळ पैठणी व फुगडी स्पर्धा घेतली जाईल तसेच ऑर्केस्ट्रा घेण्यात येणार आहेत .
