कल्लेहोळ येथे किराणा दुकानावर कोप्टाअंतर्गत कारवाई

बेळगाव : शाळा आवारापासून काही अंतरावरच तंबाखूजन्य पदार्थ आणि सिगारेटची विक्री करणाऱ्या कल्लेहोळ येथील एका किराणा दुकानावर जिल्हा तंबाखू नियंत्रण विभाग आणि पोलीस खात्याच्यावतीने कोप्टाअंतर्गत कारवाई करण्यात आली आहे. कल्लेहोळ येथील उच्च प्राथमिक मराठी शाळेपासून काही अंतरावर एका किराणा दुकानात तंबाखूजन्य पदार्थ आणि सिगारेटची विक्री केली जात आहे. त्याचबरोबर दुकानातील कचरा परिसरात पसरत असल्याने संबंधित दुकानावर कारवाई करण्यात यावी, अशी मागणी कल्लेहोळ येथील मोहन शिवराम पाटील यांनी माहिती अधिकार हक्काखाली केली होती. त्यामुळे 22 नोव्हेंरला आरोग्य खात्याच्या जिल्हा तंबाखू नियंत्रण विभाग आणि पोलीस यांच्यावतीने कारवाई करण्यात आली आहे.