विनाहेल्मेट दुचाकीस्वारांवर कारवाईचा बडगा

बेळगाव : बेळगाव शहर व उपनगरात विनाहेल्मेट दुचाकीस्वारांवर दंडात्मक कारवाई करण्याचा सपाटा वाहतूक पोलिसांनी सुरू केला आहे. पोलीस आयुक्त एस. एन. सिद्धरामप्पा यांच्या सूचनेवरून बुधवारी दिवसभर वाहतूक पोलिसांनी ही मोहीम राबविली. जिल्हा पोलिसांनीही हेल्मेटसक्तीच्या आदेशाची अंमलबजावणी करण्यास सुरुवात केली आहे. जिल्ह्यातील वेगवेगळ्या भागात दुचाकीस्वारांना गुलाब पुष्प देऊन हेल्मेटचे महत्त्व सांगण्याचे काम हाती घेतले आहे. गोकाक येथे हेल्मेट परिधान न करता दुचाकी चालविणाऱ्या एका पोलीस हवालदाराला जिल्हा पोलीसप्रमुख डॉ. भीमाशंकर गुळेद यांनी निलंबित केले आहे. जिल्ह्यापाठोपाठ बेळगाव शहरातही हेल्मेटसक्तीची अंमलबजावणी सुरू करण्यात आली आहे. बुधवारी दिवसभर वाहतूक उत्तर व दक्षिण पोलिसांनी शहर व उपनगरात वाहनचालकांना अडवून हेल्मेटची तपासणी केली. हेल्मेट परिधान न केलेल्या 300 जणांवर कारवाई करण्यात आली आहे. यासंबंधी पोलीस आयुक्त एस. एन. सिद्धरामप्पा यांच्याशी संपर्क साधला असता बुधवारपासून हेल्मेट तपासणीची मोहीम सुरू करण्यात आली आहे. यापुढे वाहतूक पोलीस रोज दुचाकीस्वारांना अडवून तपासणी करणार आहेत. अनेक अपघातात डोक्यावर हेल्मेट नसल्यामुळे दुचाकीस्वारांना प्राण गमवावा लागल्याची उदाहरणे आहेत. अपघातातील जीवितहानी टाळण्यासाठी प्रत्येकाने हेल्मेट परिधान करणे गरजेचे आहे, असे त्यांनी सांगितले. वाहतूक उत्तर विभागाचे पोलीस निरीक्षक श्रीशैल गाभी, दक्षिण विभागाचे पोलीस निरीक्षक विनायक बडीगेर व त्यांच्या सहकाऱ्यांनी या मोहिमेत भाग घेतला होता. गुरुवारी दिवसभर हेल्मेट तपासणीची मोहीम सुरू राहणार आहे, असे पोलिसांनी सांगितले.