पोक्सो खटल्यात आरोपीला जन्मठेपेची शिक्षा

बेळगाव : अल्पवयीन मुलीवर अत्याचार करणाऱ्या नराधमाला जिल्हा पोक्सो न्यायालयाने बुधवार दि. 12 रोजी जन्मठेपेची शिक्षा ठोठावली आहे. मलकारी निंगाप्पा राजापूर (वय 35 रा. हिडकल, ता. रायबाग, सध्या राहणार अथणी) असे त्याचे नाव आहे. मलकारी याने 24 डिसेंबर 2019 रोजी एका अल्पवयीन मुलीला मोटारसायकलवरून नेऊन तिच्यावर अत्याचार केला. या विषयाची कोठे वाच्यता केल्यास जीवानिशी ठार मारू, अशी धमकी दिली होती. त्यानंतर 8 जानेवारी 2020 रोजी नराधम पुन्हा पीडित मुलगी राहात असलेल्या तिच्या घरी गेला. अत्याचार करण्यासाठी तिला बळजबरीने बाहेर ओढण्याचा प्रयत्न केला. त्यावेळी पीडितेच्या आईने त्याला रोखण्याचा प्रयत्न केला असता तिलाही मारबडव केली. त्यामुळे याप्रकरणी अथणी पोलिसांनी संशयिताविरोधात पोक्सो कायद्यांतर्गत गुन्हा दाखल करून अटक केली. तत्कालिन गुन्हा दाखल अधिकारी एम. पी. वाघमोडे आणि तपास अधिकारी शंकरगौडा बसनगौडा यांनी पोक्सो न्यायालयात दोषारोप दाखल केला. त्याठिकाणी 8 साक्षीदार, 58 पुरावे आणि 17 मुद्देमाल तपासण्यात आले. त्यावेळी आरोप सिद्ध झाल्याने आरोपीला न्यायाधीश सी. एम. पुष्पलता यांनी जन्मठेपेची शिक्षा आणि 38 हजार रुपयांचा दंड ठोठावला. तसेच जिल्हा कायदा प्राधिकरणाकडून 4 लाख रुपयांची नुकसानभरपाई देण्याचा आदेशही बजावला. सरकारतर्फे अॅड. एल. व्ही. पाटील यांनी काम पाहिले.