सांगली :
एका बँकेतील निवृत्त कर्मचाऱ्यास अकाऊंट सस्पेंड होईल, अशी भीती घालून ऑनलाईन ‘केवायसी’ पूर्ण करतो असे सांगून त्याचे खाते ‘हॅक’ करून २१ लाख ७५ हजार रूपये परस्पर काढून घेतल्याचा प्रकार उघडकीस आला आहे. या फसवणुकीबाबत दिलीप मारूतीराव शिंदे (रा. प्रथमेश बंगला, घनशामनगर, सांगली) यांनी संजयनगर पोलीस ठाण्यात फिर्याद दिली आहे.
याबाबत माहिती अशी की, फिर्यादी दिलीप शिंदे हे बँक ऑफ इंडियाचे निवृत्त कर्मचारी आहेत. नोव्हेंबर २०२४ मध्ये ते घरी असताना त्यांना एका मोबाईल क्रमांकावरून एसएमएस आला. त्यामध्ये तुमचे बँक ऑफ इंडियाचे खाते आज सस्पेंड होईल. तुम्ही बँक व्यवस्थापक राहुल गुप्ता यांच्या मोबाईल क्रमांकावर संपर्क साधा, असे सांगण्यात आले होते. शिंदे यांनी थोड्या वेळाने दिलेल्या मोबाईल क्रमांकावर कॉल केला. तेव्हा समोरून बोलणाऱ्या व्यक्तीने मी राहुल गुप्ता हेड ऑफीस, बैंक ऑफ • इंडिया मुंबई येथून बोलतो आहे असे सांगितले. तुमचे, अकाऊंट सस्पेंड झाले असून ते अॅक्टीव्ह करण्यासाठी केवायसी पूर्ण करणे आवश्यक आहे. त्यासाठी आधारकार्ड क्रमांक, बँकेच्या खात्याला लिंक असलेला मोबाईल क्रमांक विचारून घेतला. तसेच एक व्हॉटस अॅप क्रमांक देऊन त्यावर माहिती शेअर करायला सांगत मोबाईल सुरूच ठेवला. शिंदे यांनी सांगितलेल्या व्हॉटस् अॅप क्रमांकावर आधारकार्ड नंबर, खात्याला जोडलेला मोबाईल क्रमांक, पिन क्रमांक शेअर केला.
राहुल गुप्ता म्हणून बोलणाऱ्या व्यक्तीने तुम्ही ज्येष्ठ नागरिक असल्यामुळे तुमचे खाते ऑनलाईन करत आहे, असे सांगून मोबाईल चालू ठेवा अशा सूचना केल्या.१५ ते २० मिनिटात प्रक्रिया पूर्ण होईल, असे सांगितले. परंतु एवढ्या कालावधीत शिंदे यांचे खातेच भामट्याने ‘हॅक’ केले. त्यानंतर त्यांच्या खात्यातील २१ लाख ७५ हजार रूपये परस्पर काढून घेतले. बँकेच्या खात्यातील मोठी रक्कम काढून घेतल्याचे दिसून येताच शिंदे यांना धक्का बसला. त्यांनी १५ नोव्हेंबर रोजी बँकेशी संपर्क साधून हा प्रकार सांगितला. गेले काही दिवस या प्रकरणांची तांत्रिक चौकशी पूर्ण झाल्यानंतर त्यांनी ११ फेब्रुवारी रोजी संजयनगर पोलीस ठाण्यात या संशयितांच्याविरूध्द फिर्याद दिली.
