पुणे / वार्ताहर :
पुण्यातील कोंढवा परिसरात एका किरकोळ वादातून भररस्त्यात तरुणास चाकूने भोसकून त्याचा निर्घृण खून करण्यात आल्याची घटना घडली. या घटनेत आरोपीही जखमी झाला असून, त्याच्यावर ससून रुग्णालयात उपचार करण्यात येत असल्याची माहिती कोंढवा पोलिसांनी दिली.
अहमद रजा खान (वय- २१ रा. युनिटी पार्क, कोंढवा, पुणे) असे खून झालेल्या तरुणाचे नाव आहे. याप्रकरणी सलीम इब्राहिम खान (वय -४९ रा. नवाजीश चौक, कोंढवा, पुणे) या आरोपीच्या विरुद्ध खुनाचा गुन्हा दाखल करण्यात आला आहे. अहमद खान याचा भाऊ सलमान फारुख खान (वय- २३) याने या संदर्भात कोंढवा पोलीस ठाण्यात आरोपी विरोधात फिर्याद दिली आहे. या झटापटी दरम्यान आरोपी सलीम खान जखमी झाला असून, त्याच्यावर ससून रुग्णालयात उपचार सुरु आहेत. अहमद रजा खान मंगळवारी रात्री नऊ वाजण्याच्या सुमारास कोंढव्यातील गरीब नवाज हाॅस्पिटलसमोरुन निघाला होता. त्या वेळी सलीम खान याने अहमदकडे बघून शिवीगाळ केली. शिवीगाळ का केली, अशी विचारणा अहमदने आरोपी सलीमकडे केली. अहमदने त्याच्याकडील चाकू उगारुन त्याला जबदस्तीने धमकावण्याचा प्रयत्न केला. त्यावेळी आरोपी सलीमने अहमदच्या हातातील चाकू हिसकावून घेतला आणि अहमदला चाकूने भोसकले. गंभीर जखमी झालेल्या अहमदला तातडीने जवळच्या रुग्णालयात दाखल करण्यात आले. परंतु उपचारांपूर्वीच त्याचा मृत्यू झाला होता. सहायक पोलीस निरीक्षक आर. एस. मोहिते याबाबत पुढील तपास करत आहेत.
