राजापूर शहर वार्ताहर
शहरातील तालीमखाना येथील वसीम सादीक काझी (35) या तरूणाचा मुंबई-पुणे द्रुतगतीमार्गावरील बोरघाटात झालेल्या भीषण अपघातात मृत्यू झाला. या घटनेने राजापुरात शोककळा पसरली आहे. हा अपघात गुरूवारी मध्यरात्री घडला.
बोरघाटात मध्यरात्री इर्टीगा कारचा भीषण अपघात झाला. यात राजापूर शहरातील वसीम काझी या तरूणासह अब्दुल रहमान खान, (32, घाटकोपर), अनिल सानप, राहुलकुमार पांडे, (30, कामोठे, नवी मुंबई), आशुतोष गाडेकर (23, अंधेरी, मुंबई) यांचा मृत्यू झाला तर चालक मच्छिंद्र आंबोरे (38), अमीरउल्ला चौधरी, दीपक खैराल हे तिघे गंभीर जखमी आहेत. अस्फीया रईस चौधरी, (25, कुर्ला) या किरकोळ जखमी झाल्या आहेत.
या अपघातात कारचा चक्काचूर झाला आहे. जखमी प्रवाशांना तत्काळ नवी मुंबईच्या रुग्णालयात दाखल करण्यात आले आहे. या अपघातामुळे काही काळ वाहतूक कोंडी झाली होती. सादीक राजापुरातून पुणे व तेथून मुंबई येथे जात असताना काळाने त्याच्यावर झडप घातली. त्याच्या पश्चात पत्नी, मुलगा, मुलगी, भाऊ असा परिवार आहे.
