औंध :
औंध येथील 28 वर्षीय युवकाचा डोक्यात दगड घालून खून झाला असून औंध पोलिसांनी तपासाची चक्रे फिरवित दोन आरोपींना अटक केली आहे. रामदास अशोक दंडवते (वय 28 रा. औंध) असे खून झालेल्या युवकाचे नाव आहे.
याबाबत घटनास्थळ व पोलिसांकडून मिळालेली अधिक माहिती अशी, सोमवारी सायंकाळी अज्ञात इसमाचा मृतदेह गोपूज येथील औंध रोडच्या सुतारखडवी परिसरात सापडला होता. संबंधित इसमाचा मृत्यू नेमका कशामुळे झाला याचे गुढ निर्माण झाले होते. औंध पोलीस स्टेशनचे सपोनि अविनाश मते यांनी सूत्रे हलवत अवघ्या बारा तासात मृतदेहाची ओळख पटवत दोन आरोपींना जेरबंद केले आहे.
शनिवार दि. 21 डिसेंबर रोजी दुपारी साडे बारानंतर आरोपी रोहन मल्हारी मदने व गुरूराज दत्तात्रय मदने या चुलत चुलते, पुतणे व मृत रामदास अशोक दंडवते हे सुतार खडवी परिसरात मद्यपान करत बसले होते. या दरम्यान आपापसात वादावादी झाली. त्यानंतर शिवीगाळ झाली व शेवटी याचे पर्यावसन मारामारीत झाले. यामध्ये मयत रामदास दंडवते याच्या डोक्यात दगड रोहन मदने याने घातल्याने रक्तस्राव होऊन दंडवते याचा मृत्यू झाला.
सदरचा मृतदेह कोणास सापडू नये म्हणून दोन्ही आरोपींनी सुतार खडवी जवळच्या झाडीत लपवून ठेवला. जवळजवळ दहा दिवस हा मृतदेह त्या झाडीत तसाच होता.
दरम्यान, याबाबत पोलिसांना या घटनेची माहिती मिळाल्यानंतर सपोनि अविनाश मते यांच्या मार्गदर्शनाखाली गोपूज, औंध, खरशिंगे परिसरात कसून शोध घेतल्यानंतर रामदास दंडवते याचा मृतदेह गोपूजनजीक सापडला. त्यानंतर संशयित आरोपी रोहन मल्हारी मदने यास सोमवारी सायंकाळी ताब्यात घेऊन सपोनि अविनाश मते यांनी रोहन याच्याकडे कसून चौकशी केली. पोलीसी खाक्या दाखवताच गुह्याची कबुली दिली व यामध्ये आपल्यासह चुलत चुलते गुरूराज दत्तात्रय मदने सहभागी असल्याचे सांगितले. पोलिसांनी लगेचच मिळालेल्या माहितीनुसार जेजुरी येथे पथक पाठवून शोध घेतला असता लोणंद येथून मंगळवारी पहाटे चार वाजता गुरूराज मदने यास ताब्यात घेतले.
सध्या दोन्ही आरोपी औंध पोलिसांच्या ताब्यात आहे.
दोन्ही आरोपींना वडूज कोर्टाने दोन दिवस पोलीस कोठडीत ठेवण्याचे आदेश दिले आहेत. सदर घटनेची फिर्याद लिला अशोक दंडवते यांनी दिली आहे. या घटनेमुळे औंध परिसरात एकच खळबळ उडाली असून औंध परिसरात शांतता पसरली आहे. घटनास्थळी कोरेगावच्या उपविभागीय पोलीस अधिकारी सोनाली कदम यांनी भेट देऊन पाहणी केली.
सदर घटनेचा अधिक तपास सपोनि अविनाश मते यांच्या मार्गदर्शनाखाली पोलीस उपनिरीक्षक सतीश मयेकर, अनिल शिरोळे, अविनाश वाघमारे, पोलीस हवालदार राहुल वाघ, दादासाहेब देवकुळे, पोलीस कॉन्स्टेबल साहिल झारी, प्रमोद इंगळे करीत आहेत.
