गुळेलीत फणसापासून विविध खाद्यपदार्थ बनवण्याची कार्यशाळा

वाळपई : गुळेली सत्तरी येथील शांतादुर्गा युवा संस्थेच्या कार्यालयात एक दिवसीय फणसापासून विविध खाद्यपदार्थ बनवण्याची कार्यशाळा झाली. वाळपई येथील क्षेत्रीय कृषी कार्यालयातर्फे सदर कार्यक्रमाचे आयोजन करण्यात आले होते. यावेळी क्षेत्रीय कृषी अधिकारी विश्वनाथ गावस, कृषी सहाय्यक अधिकारी ओंकार गावकर, फिंल्ड असिस्टंट देऊ झोरे, बी.टी.एम. पृथ्वीराज नाईक, एटीएम रमेश गावकर आणि अनिऊद्ध गावठणकर उपस्थित होते. तसेच या कार्यशाळेला मार्गदर्शक म्हणून मोर्ले कॉलनी सत्तरीची दामिनी डेगवेकर उपस्थित होत्या. यावेळी डेगवेकर यांनी प्रत्यक्ष कृतीतून कशा प्रकारे पदार्थ बनवतात याचे प्रात्यक्षिक उपस्थित महिलांना दाखवले. विश्वनाथ गावस यांनी यावेळी उपस्थित महिलांना मार्गदर्शन केले. फणस उत्पादनातून चांगल्या प्रकारची आर्थिक क्रांती निर्माण होऊ शकते. सत्तरी तालुक्यामध्ये मोठ्या प्रमाणात फणसाची झाडे आहेत. यातून प्रचंड प्रमाणात उत्पादन होत असते. यामुळे प्रत्येक महिलांनी फणसापासून वेगवेगळ्या प्रकारचे पदार्थ उत्पादित करण्याचे कौशल्य शिकून घ्यावे व बाजारपेठेमध्ये असे पदार्थ उपलब्ध केल्यास त्याला चांगल्या प्रकारची मागणी आहे. त्याचप्रमाणे राष्ट्रीय स्तरावरही चांगल्या प्रकारची बाजारपेठ या पदार्थाच्या माध्यमातून उपलब्ध होऊ शकते. त्यामुळे प्रत्येकाने या संदर्भात विशेष लक्ष द्यावे अशी विनंती यावेळी विश्वनाथ गावस यांनी केली. गुळेली ग्रामपंचायत सदस्य अक्षिता अनिल गावडे यांनी कृषी खात्याच्या संपूर्ण टिमचे यावेळी आभार व्यक्त केले.