जिजामाता चौक येथे वाहनाची लोखंडी खांबाला धडक

बेळगाव : जुना धारवाड रोडवरील जिजामाता चौक येथील लोखंडी खांबाला मालवाहू ट्रकने जोरदार धडक दिल्याची घटना सोमवारी रात्री घडली. यामुळे खांब एका बाजूला कलंडला. धोकादायक स्थितीत असलेला लोखंडी खांब बदलण्याची मागणी केली जात होती. अखेर क्रेनच्या साहाय्याने खांब काढण्यात आला. शहरातील एक महत्त्वाचा चौक म्हणून जिजामाता चौकाची ओळख आहे. या ठिकाणी लोखंडी खांब बसविण्यात आला असून त्यावर जिजामाता चौक म्हणून फलक लावण्यात आला होता. सोमवारी रात्री एका अवजड वाहनाने या लोखंडी खांबाला धडक दिली. अवजड वाहन वळविणे चालकाला जमले नसल्याने खांबाला धडक बसली. यामध्ये खांब व चौथऱ्याच्या बांधकामाचे नुकसान झाले. ही धडक जोराची असल्याने खांब एका बाजूला कलंडला होता.