दुचाकी स्वार गंभीर जखमी
रायगड प्रतिनिधी
मुंबई गोवा राष्ट्रीय महामार्गावर अपघातांची मालिका सुरूच असून आज सकाळी महाड तालुक्यातील नडगाव गावाच्या हद्दीत ४ वाहनांचा विचित्र अपघात झाला आहे. या अपघातामध्ये २ पिक अप, एक स्कॉर्पिओ व एक केटीएम दुचाकी यांचा समावेश आहे.
महाड औद्योगिक पोलीस ठाण्याच्या सूत्राने दिलेल्या माहितीनुसार या अपघातातील स्कॉर्पिओ (एम एच ०४ ई जे ६७३०), पिकअप ( एम एच ०७ ए जे २०१०) व केटीएम दुचाकी (एम एच ०६ सी सी ५६७५) स्वार महाडच्या दिशेकडे जात असताना समोरून येणाऱ्या पिकअप क्रमांक (एम एच ०७ ए जे ६०६४) याने पहिल्यांदा दुचाकीला जोरदार धडक दिली व नंतर स्कॉर्पिओ व पिकअप वर आदळला. यामध्ये दूचाकीवरील दोघेजण गंभीर जखमी झाले आहेत. सुरज पवार आणि राहुल वाघमारे अशी दोन जखमींची नावे आहेत. त्यांना जखमी अवस्थेत महाड ग्रामीण रुग्णालय येथे उपचारासाठी दाखल करण्यात आले मात्र त्यांना पुढील उपचारासाठी मुंबई येथे हलवण्यात आले आहे. घटनास्थळी महाड एमआयडीसी पोलीस दाखल झाले असून पंचनामा करून पुढील तपास करत आहेत.
