दोरीवरील उड्या-बँड पथक शिबिराला उत्स्फूर्त प्रतिसाद

बेळगाव : सार्वजनिक शिक्षण खात्यातर्फे यावर्षीपासून दोन नवीन खेळांना प्राधान्य देण्यात आले असून दोरीवरच्या उड्या व बँड पथक यांचे प्रात्यक्षिके सादर करून शिबिर भरविण्यात आले. याला प्रचंड प्रतिसाद मिळाला. इस्लामिया स्कूलच्या सभागृहात आयोजित करण्यात आलेल्या या शिबिरप्रसंगी व्यासपीठावर पीईओ जे. बी. पटेल, जिल्हा शारीरिक संघटनेचे अध्यक्ष आर. पी. वंटगुंडी, शहर अध्यक्ष हनुमंत मास्तेहोळी, प्राथमिक संघटनेचे अध्यक्ष संजू बडिगेर, इस्लामियाचे मुख्याध्यापक बेळगावकर आदी मान्यवर उपस्थित होते. या बैठकीत 2023-24 च्या क्रीडा स्पर्धेत दोरीवरच्या उड्या व बँक पथक यांचा समावेश करण्यात आला असून त्याची जागृती करण्यासाठी बुधवारी शिबिर आयोजित करण्यात आले होते. दोरीवरील उड्या या शिबिराचे मार्गदर्शन लव्ह डेल स्कूलचे क्रीडा शिक्षक बसू अगसगी यांनी केले. दोरीवरील उड्यांचे फायदे व तोटे सांगून कशाप्रकारे विद्यार्थ्यांना त्याचा सराव करून घ्यावा याबद्दलची माहिती देऊन प्रात्यक्षिके सादर केली. दुसरा विभाग म्हणजे बँड पथक बेळगाव शहर विभागात बँड पथकाची नितांत गरज आहे. केवळ एक किंवा दोन शाळांमध्येच बँड पथक असल्याकारणाने क्रीडा स्पर्धेवेळी त्यांची गरज भासते. पण सर्व शाळांनी बँड पथक सुरू करण्यासाठी राज्य सरकारने आदेश दिला आहे. या आदेशाचे पालन करून आज या शिबिरात बँड पथकाचे मार्गदर्शन सेंट पॉल्स स्कूलचे क्रीडा शिक्षक अॅन्थोनी डिसोझा यांनी आपल्या शालेय विद्यार्थ्यांसह बँड पथकाचे सादरीकरण केले. पथसंचलन करतेवेळी कशाप्रकारे व कोणत्या तालावरती बँड सादरीकरण करावे, याबद्दलची माहिती देऊन प्रात्यक्षिके सादर केली. ही प्रात्यक्षिके पाहून उपस्थित सर्व क्रीडा शिक्षक भारावून गेले. यावेळी मान्यवरांच्या हस्ते शिबिरात मार्गदर्शन करणाऱ्या अॅन्थोनी डिसोझा व बसू अगसगी यांचा खास शाल, श्रीफळ देऊन सत्कार करण्यात आला. यावेळी बेळगाव शहरातील शारीरिक शिक्षक मोठ्या संख्येने उपस्थित होते.