शौर्य चौक येथे भरधाव वाहनाची विद्युतखांबाला धडक

बेळगाव : कॅम्प येथील शौर्य चौकनजीक एका इनोव्हा कारची जोरदार धडक बसल्याने विद्युतखांब कोसळल्याची घटना रविवारी दुपारी घडली. यामध्ये कारचे नुकसान झाले असून विद्युतखांब कोसळला असून तारांचेही नुकसान झाले आहे. गांधी चौक येथून शौर्य चौककडे येणाऱ्या भरधाव कारचालकाचे नियंत्रण सुटल्याने कार रस्त्याच्या दुसऱ्या बाजूला जाऊन विद्युत खांबाला धडकली. धडक इतकी जोरदार होती की, विद्युतखांब जमिनीपासून उचकटून रस्त्यावर पडला. यामुळे विद्युत वाहिन्यांचेही नुकसान झाले आहे. यामुळे काही काळ वाहतूक बंद ठेवावी लागली. हेस्कॉमच्या कर्मचाऱ्यांना याची माहिती देऊन वीजपुरवठा बंद करावा लागला.