वृत्तसंस्था/ अलूर
2023 च्या क्रिकेट हंगामातील येथे सुरू असलेल्या दुलिप करंडक क्रिकेट स्पर्धेतील उपांत्य फेरीच्या सामन्यात शुक्रवारी खेळाच्या तिसऱ्या दिवसाअखेर पश्चिम विभागाने दुसऱ्या डावात 9 बाद 292 धावा जमवत मध्य विभागावर 384 धावांची भक्कम आघाडी मिळवली. पश्चिम विभागाच्या डावात चेतेश्वर पुजाराने दमदार शतक झळकवले. पश्चिम विभागाचा संघ आता या स्पर्धेत अंतिम फेरीच्या दिशेने वाटचाल करत आहे.
या सामन्यात पश्चिम विभागाने पहिल्या डावात 220 धावा जमवल्यानंतर मध्य विभागाचा पहिला डाव 128 धावात आटोपल्याने पश्चिम विभागाने 92 धावांची आघाडी मिळवली. त्यानंतर पश्चिम विभागाने 3 बाद 149 या धावसंख्येवरून तिसऱ्या दिवशीच्या खेळाला पुढे प्रारंभ केला आणि 92 षटकात त्यांनी दुसऱ्या डावात 9 बाद 292 धावा जमवल्या. चेतेश्वर पुजाराने 278 चेंडूत 1 षटकार आणि 14 चौकारासह 133 धावा झळकवताना सूर्यकुमार यादवसमवेत तिसऱ्या गड्यासाठी 95 धावांची भागीदारी केली. सूर्यकुमार यादवने 58 चेंडूत 1 षटकार आणि 8 चौकारासह 52 धावा जमवल्या. हेट पटेलने 3 चौकारासह 27 धावा केल्या. या सामन्यातील खेळाचा एक दिवस बाकी असून पश्चिम विभागाचा संघ विजयाच्या दिशेने वाटचाल करीत आहे. पश्चिम विभागाच्या दुसऱ्या डावात मध्य विभागातर्फे सौरभकुमारने 79 धावात 4 तर सारांश जैनने 3 व यश ठाकुरने एक गडी बाद केला. पश्चिम विभागाने या सामन्यात पहिल्या डावातील घेतलेल्या आघाडीच्या जोरावर या स्पर्धेची अंतिम फेरी आताच निश्चित केली आहे.
संक्षिप्त धावफलक
संक्षिप्त धावफलक : पश्चिम विभाग प. डाव 92.5 षटकात सर्वबाद 220, मध्य विभाग प. डाव 31.3 षटकात सर्वबाद 128, पश्चिम विभाग दु. डाव 92 षटकात 9 बाद 292 (पृथ्वी शॉ 25, पांचाळ 15, पुजारा 133, सूर्यकुमार यादव 52, सर्फराज खान 6, हेट पटेल 27, अतित सेट 9, जडेजा 9, सौरभ कुमार 4-79, सारांश जैन 3-56, यश ठाकुर 1-35).
