पाली :
मुंबई गोवा राष्ट्रीय महामार्गावरील खानू गावच्या हद्दीतील महामार्ग लगतच्या एका घराच्या बाहेर असलेल्या तीन कुत्र्यांवर बिबट्याने मध्यरात्री दोन वाजण्याच्या दरम्यान येऊन हल्ला करून त्यातील ऐका कुत्र्याला ठार मारून घेऊन गेला तर दुसऱ्या दोन कुत्र्यांना जखमी केले आहे. हा सर्व प्रकार सीसीटीव्ही कॅमेऱ्यामध्ये कैद झाला आहे. महामार्गालगत भर वस्तीत बिबट्याने थेट घरासमोरील भागात येऊन अशाप्रकारे केलेल्या हल्ल्यामुळे सध्या या परिसरातील नागरिकांमध्ये बिबट्याच्या अस्तित्वामुळे भीतीचे वातावरण पाहावयास मिळत आहे.
याबाबत घटनास्थळावरून मिळालेली माहिती अशी की, मुंबई गोवा महामार्गालगत खानू गावच्या हद्दीत सेवानिवृत्त शिक्षक संतोष आयरे यांचे घर असून त्या घराच्या बाहेरच्या बाजूला त्यांचे तीन कुत्रे रात्री बसलेले होते मध्यरात्री दोन वाजण्याच्या सुमारास अचानक कुत्र्यांच्या भुंकण्याचा जोरजोरात आवाज येऊ लागल्याने तात्काळ श्री.आयरे यांनी घराबाहेर येऊन पाहिले असता दोन कुत्रे जखमी अवस्थेत पडलेले होते तर एका कुत्र्याला बिबट्या घेऊन जात असल्याचे दिसले. त्यानंतर त्यांनी प्रथमता जखमी कुत्र्यांना तात्काळ उपचार केले व घराच्या बाहेर असण्राया सीसीटीव्ही कॅम्रेयामध्ये ही घटना कैद झाली आहे.
