कलंबिस्त हायस्कूलच्या दहावीच्या १९९८-९९ बॅचचा आदर्श
ओटवणे प्रतिनिधी
कलंबिस्त इंग्लिश स्कूल मधील दहावीच्या १९९८-९९ या बॅचमधील शशिकांत सोमा पास्ते या युवकाचे नुकतेच अकाली आकस्मित निधन झाले. घरची आर्थिक परिस्थिती गरीबीची त्यात कमावता तो एकच असल्यामुळेत् याच्या कुटुंबीयांवर दुःखाचा डोंगरच कोसळला. त्यामुळे त्याच्या बॅचच्या वर्ग मित्रांनी १० हजार रुपयाची आर्थिक मदत करीत आपल्या वर्गमित्राच्या कुटुंबाला मदतीचा हात दिला.
शांत, संयमी, मनमिळावू स्वरूपाचा असलेला शशिकांत पास्ते हा शिक्षक प्रिय विद्यार्थीही होता. त्याच्या अकाली निधनाचा मित्र परिवारासह सर्वांनाच धक्का बसला. त्याच्या घरची परिस्थिती गरिबीची असून घरात कमवता तो एकच होता. त्यामुळे त्याच्या जाण्यामुळे कुटुंबाचा आधारच हरपला.
शशिकांत पास्ते याच्या पश्चात लहान मुलगी, पत्नी आणि आई असा परिवार आहे. आपल्या मित्राच्या पश्चात त्याचे कुटुंबीय संकटात असताना त्यांना मदत करून या बॅचमधील वर्गमित्रांनी समाजापुढे एक वेगळा आदर्श समोर ठेवला आहे. याबद्दल कै शशिकांत पास्ते याच्या बॅचच्या सर्व वर्गमित्रांचे कौतुक होत आहे.
