मळगावात उभ्या बसला डंपरची धडक ; डंपर चालकासह तिघे गंभीर

न्हावेली / वार्ताहर
मुंबई गोवा महामार्गाच्या झाराप पत्रादेवी बायपासवर मळगाव ब्रिजच्यावरील भागात उभ्या असलेल्या पणजी येथून मुंबईच्या दिशेने जाणाऱ्या स्लीपर कोच लक्झरी बसला मागाहून येणाऱ्या डंपरने जोरदार धडक दिली.हा अपघात बुधवारी रात्री नऊ वाजण्याच्या सुमारास झाला . या अपघातात डंपरचालक केबिनमध्ये अडकून पडला.तर बसच्याखाली काम करीत असलेला बसचालक व अन्य एक प्रवासी असे दोघेजण गंभीर जखमी झाले .या तिघानांही सावंतवाडी उपजिल्हा रुग्णालयात उपचारार्थ दाखल करण्यात आले आहे . याबाबत अधिक माहिती अशी की,गोवा पणजी येथून मुंबईच्या दिशेने जाणारी नॅशनल ट्रॅव्हल्सची स्लीपर कोच बस ( जीए ०७ एफ ८९९७ ) ही बस मुंबई च्या दिशेने जात होती.झाराप पत्रादेवी बायपासवर मळगाव ब्रिजच्यावर आली असताना गाडीत बिघाड झाल्याने गाडीचा पर्यायी चालक व क्लीनर गाडीखीली उतरले.गाडीच्या मागील भागात जाऊन ते पाहणी करत असताना पाठीमागून कुडाळच्या दिशेने वेगात जाणाऱ्या डंपर ( जीए ०४ टी ४४८८ ) ने उभ्या बसला जोरदार धडक दिली.या अपघातात बसखाली पाहणी करणारे चालक बाबुराव चव्हाण ( ५२ ) व क्लिनर अमीर खान ( ३० दोघेही रा.गोवा ) यांना गंभीर दुखापत झाली.तर डंपर चालक आनंद तारी( ५० रा.कुडाळ ) हा डंपरच्या केबिनमध्ये अडकून पडला.त्याच्या दोन्ही पायांना गंभीरित्या दुखापत झाली होती.
या अपघाताची माहिती मिळताच सावंतवाडी पोलीस निरीक्षक अमोल चव्हाण व अन्य पोलीस अधिकारी व कर्मचारी घटनास्थळी दाखल झाले होते .रुग्णवाहिकेच्या सहाय्याने त्यांनी जखमींना सावंतवाडी उपजिल्हा रुग्णालयात दाखल करण्यात आले.प्राथमिक उपचारानंतर यातील बसचालक बाबुराव चव्हाण व डंपरचालक आनंद तारी या दोघांना गोवा बांबुळी रुग्णालयात हलविण्यात आले.स्थानिक ग्रामस्थ तसेच बसमधील प्रवासी व अन्य वाहनचालकांनी जखमींना रुग्णालयात हलविण्यासाठी तसेच डंपरच्या केबिनमध्ये अडकलेल्या चालकाला बाहेर काढण्यासाठी मोठे सहकार्य केले.याबाबतची खबर मुख्य चालक सुधाकर लक्ष्मण मोरे ( ५० ऐरोली नाका चिंचपाडा,नवी मुंबई ) यांनी सावंतवाडी पोलिस ठाण्यात केली असून पोलीस अधिक तपास करीत आहेत.