तांदुळवाडीतील वृद्ध दांम्पत्याचा जागीच मृत्यू
प्रतिनिधी/ कोरेगाव
सातारा-लातूर राष्ट्रीय महामार्गावर कोरेगाव शहरात पंचायत समिती कार्यालयानजिक उसाच्या ट्रक्टर ट्रॉलीला ओव्हरटेक करत येऊन समोर येणाऱया दुचाकीला भरधाव मालट्रकने जोरात धडक दिली. या अपघातात तांदुळवाडीतील वृद्ध दांपत्य जागीच ठार झाले. बजरंग नारायण काटकर (वय 59) व त्यांच्या पत्नी शोभा बजरंग काटकर (वय 55) असे मयत दाम्पत्याचे नाव आहे. या अपघाताची नोंद कोरेगाव पोलीस ठाण्यात करण्यात आली आहे. या अपघातामुळे तांदुळवाडी पंचक्रोशीवर शोककळा पसरली आहे.
याबाबत अधिक माहिती अशी, तांदूळवाडी येथील बजरंग नारायण काटकर (वय 59) व त्यांच्या पत्नी शोभा बजरंग काटकर (वय 55) हे दोघे दुचाकीवरून कोरेगाव शहरात येत होते. त्याचवेळी ऊस वाहतूक करणारे ट्रक्टर ट्रॉली ही कुमठे फाटय़ाच्या दिशेने निघाली होती. ट्रक्टर ट्रॉलीला ओव्हरटेक करत भरधाव मालट्रक निघाला होता. ट्रकने समोरून येणाऱया दुचाकीला जोरात धडक दिली. दुचाकी सुमारे वीस ते पंचवीस फूट फरफटत गेल्याने काटकर दाम्पत्याचा जागीच मृत्यू झाला. अपघातस्थळी नागरिकांची मोठी गर्दी झाली होती.
घटनास्थळी दाखल झालेल्या पोलीस कर्मचाऱयांनी तातडीने काटकर दाम्पत्याला ग्रामीण रुग्णालयात नेले. अपघातानंतर मालट्रक चालक फरार झाला असून पोलिसांनी ट्रक पोलीस ठाण्याच्या आवारात आणून लावला आहे. ग्रामीण रुग्णालयात बजरंग काटकर व शोभा काटकर यांच्या मृतदेहाचे शवविच्छेदन करण्यात आले. याप्रकरणी कोरेगाव पोलीस ठाण्यात अपघाताची नोंद करण्यात आली आहे.
दुचाकीत सापडली भगवत गीता
काटकर दाम्पत्य हे कोरेगाव शहराच्या दिशेने येत होते. त्यांच्या दुचाकीला पिशवी अडकवली होती. त्या पिशवीमध्ये भगवत गीता होती. अपघातानंतर रस्त्याच्या कडेला पडलेले पिशवीतून भगवत गीता पाहताच नागरिक देखील हळहळले.
