प्रतिनिधी/ पुणे
माध्यमांकडे आजही समाज मोठ्या अपेक्षेने बघत असून, ध्येयवादी पत्रकार हे समाजाचे वैभव आहे, असे प्रतिपादन ‘तऊण भारत’चे समूह प्रमुख व सल्लागार संपादक आणि लोकमान्य मल्टिपर्पज को-ऑप. सोसायटीचे संस्थापक-अध्यक्ष डॉ. किरण ठाकुर यांनी शनिवारी येथे काढले. पुण्यातील माध्यम समन्वयक प्रवीण प्र. वाळिंबे आणि त्यांच्या सहकाऱ्यांनी निवृत्त ज्येष्ठ पत्रकार स्नेहमेळाव्याचे आयोजन केले होते. यावेळी डॉ. किरण ठाकुर बोलत होते.
ज्येष्ठ गांधीवादी विचारवंत उल्हास पवार, ‘पुणे फेस्टिव्हल’चे उपाध्यक्ष व ‘कोहिनूर ग्रुप’चे अध्यक्ष कृष्णकुमार गोयल आणि ‘तऊण भारत’चे समूह प्रमुख व सल्लागार संपादक आणि लोकमान्य मल्टिपर्पज को-ऑप. सोसायटीचे संस्थापक-अध्यक्ष डॉ. किरण ठाकुर प्रमुख पाहुणे म्हणून उपस्थित होते. त्यांच्या हस्ते वयाची 75 वर्षे पूर्ण केलेल्या 21 निवृत्त ज्येष्ठ पत्रकारांचा पुणेरी पगडी आणि पुस्तके भेट देऊन सन्मान करण्यात आला. त्या वेळी ते बोलत होते.
डॉ. किरण ठाकुर म्हणाले की, पत्रकारिता हा धर्म असून, लोकशाहीचा चौथा स्तंभ आहे. आजही माध्यमांकडे समाज अपेक्षेने बघतो. ध्येयवादी पत्रकार हे समाजाचे वैभव असून, पुण्यातील निवृत्त ज्येष्ठ पत्रकारांचा असा स्नेहमेळावा महाराष्ट्रात एकमेव होत असावा.
उल्हास पवार म्हणाले की, राजकारण्यांवर आणि समाजातील गैरप्रवृत्तींवर अंकुश ठेवणारे पत्रकार निष्ठेने आयुष्यभर एका अर्थाने समाजाची सेवाच करीत असतात. आज आर्थिक परिस्थिती थोडी बदलली असली, तरी पूर्वीच्या काळी पत्रकारांना पोटाला चिमटा देऊन आपली सेवा बजावावी लागत असे. परंतु अशा कष्टदायी वातावरणातही अनेक पत्रकारांनी उत्तम काम करून चांगली समाजसेवा करीत उत्तम आदर्श लोकांपुढे ठेवला आहे. पुण्यात अशा सेवाभावी वृत्तीने काम करणाऱ्या पत्रकारांची संख्या लक्षणीय आहे. त्यामुळे पुण्यातील पत्रकार महाराष्ट्रातील तमाम पत्रकारांसाठीचे आदर्श ठरले आहेत.
कृष्णकुमार गोयल म्हणाले की, पूर्वी पगार कमी होते, तरी पत्रकारितेतील निष्ठा मोठी होती. समाजाचे प्रबोधन करीत समाजाला चांगली दिशा देण्याचे काम पत्रकारांच्या जुन्या पिढीने केले. जुन्या पिढीतील पत्रकार हे ‘कोहिनूर’ हिऱ्याप्रमाणे चकमदार असून, समाजाला त्यांनी दीपस्तंभाप्रमाणे मार्गदर्शन केले.
‘अक्षरकला मीडिया’चे प्रमुख व कार्यक्रमाचे संयोजक प्रवीण प्र. वाळिंबे यांनी कार्यक्रमाचे प्रास्ताविक केले. तन्मयी मेहेंदळे-कुलकर्णी यांनी स्वागतगीत गायिले. ज्येष्ठ पत्रकार अविनाश गोडबोले यांनी पुण्यातील दिवंगत पत्रकारांच्या नावांच्या यादीचे वाचन केले. श्रुती तिवारी यांनी आभार मानले.
पत्रकारांनी जागवल्या जुन्या आठवणी
स्नेहमेळाव्यात जुन्या पिढीतील निवृत्त ज्येष्ठ पत्रकारांनी वृत्तपत्र क्षेत्रातील जुने संदर्भ, सामाजिक घडामोडी व महत्त्वाच्या घटनांना उजाळा देत पत्रकारितेच्या काळातील आठवणी जागवल्या. निवृत्त ज्येष्ठ पत्रकारांतर्फे डॉ. कुमार सप्तषी, कर्नल विनायक तांबेकर, अरविंद गोखले, सुधीर गाडगीळ, मुकुंद संगोराम, चंद्रशेखर कारखानीस, विनीता देशमुख, राजीव साबडे आदींनी मनोगत व्यक्त केले. कार्यक्रमाला सुमारे 100 हून अधिक निवृत्त ज्येष्ठ पत्रकार उपस्थित होते.
