- तर बारावीची परीक्षा तुर्तास स्थगित
ऑनलाईन टीम / नवी दिल्ली :
देशात कोरोनाचा संसर्ग वेगाने वाढत आहे. त्यामुळे सद्य स्थितीतील कोरोना रुग्ण संख्या लक्षात घेऊन काउंसिल फॉर द इंडियन स्कूल सर्टिफिकेट एक्झामिनेशन्स (ICSE board) बोर्डाने दहावीची परीक्षा रद्द करण्याचा निर्णय घेतला आहे. तर बारावीची परीक्षा ही ऑफलाईन पद्धतीनेच होईल. या परीक्षेची नवी तारीख आणि वेळापत्रक आणखी काही दिवसांनी जाहीर करण्यात येईल, असे ICSE बोर्डाकडून सांगण्यात आले आहे.
आयसीएसईकडून देण्यात आलेल्या माहितीनुसार, कोरोनाच्या वाढत्या प्रादुर्भावामुळे दहावीची परीक्षा रद्द करण्याचा निर्णय घेण्यात आला आहे. दहावीची परीक्षा रद्द करण्यात आलेली असली तरी बारावीची परीक्षा मात्र होणार आहे.
ऑफलाईन पद्धतीने होणाऱ्या बारावीच्या परीक्षेचे वेळापत्रक लवकरच जाहीर करण्यात येईल. तसेच अकरावीच्या विद्यार्थ्यांची प्रवेशप्रक्रिया लवकरात लवकर सुरु होईल असेही सांगण्यात आले आहे.
दरम्यान, यापूर्वी कोरोनाचा वाढता प्रादुर्भाव लक्षात घेत सीबीएसई बोर्डाकडून दहावीची परीक्षा रद्द करण्यात आली आहे. तर बारावीची परीक्षा पुढे ढकलण्याचा निर्णय घेतला आहे. ‘सीबीएसई’प्रमाणेच महाराष्ट्र राज्यानेही दहावीच्या परीक्षा रद्द करण्याची मागणी पुढे आली आहे.
मात्र, महाराष्ट्र राज्य मंडळाच्या परीक्षा पुढे ढकलून त्या मे-जूनमध्ये घेणार असल्याचे शिक्षण विभागाने नुकतेच जाहीर केले आहे. त्यामुळे आता महाराष्ट्र सरकार या दोन्ही बोर्डांच्या पावलावर पाऊल ठेवणार का, याकडे सर्वांचे लक्ष लागले आहे.
