सातव्यांदा निर्णय : तब्बल पाच महिन्यांसाठी पुढे ढकलल्या निवडणुका
प्रतिनिधी / सिंधुदुर्गनगरी:
राज्यात पुन्हा कोरोनाचा प्रादुर्भाव वाढू लागल्याने सिंधुदुर्ग जिल्हा बँकेची निवडणूक पुन्हा पाच महिन्यांसाठी पुढे ढकलण्यात आली आहे. सर्व सहकारी संस्थांच्या निवडणुका या पूर्वी 31 मार्चपर्यंत पुढे ढकलण्यात आल्या होत्या. आता या निवडणुका पुन्हा तब्बल पाच महिने म्हणजेच 31 ऑगस्टपर्यंत निवडणुका पुढे ढकलण्यात आल्या आहेत. राज्य शासनाच्या सहकार विभागाने निवडणूक पुढे ढकलल्याचे आदेश जारी केले आहेत.
कोरोना संसर्गामुळे गेले वर्षभर सर्वच निवडणुका थांबल्या होत्या. कोरोना विषाणू आणि त्यामुळे उद्भवलेल्या गंभीर परिस्थितीमुळे राज्यावर आलेली नैसर्गिक आपत्ती विचारात घेता. विषाणूचा संसर्ग टाळण्यासाठी राज्यातील सर्व सहकारी संस्थांच्या निवडणुका 18 मार्च 2020 रोजीच्या आदेशान्वये 17 जून 2020 पर्यंत, तसेच 17 जून 2020 रोजीच्या आदेशान्वये 16 सप्टेंबर 2020 पर्यंत, 28 सप्टेंबर 2020 रोजीच्या आदेशान्वये 31 डिसेंबर 2020 पर्यंत पुढे ढकलण्यात आल्या होत्या. त्यानंतर राज्य मंत्रिमंडळाने घेतलेल्या निर्णयानुसार राज्यातील सर्व सहकारी संस्थांच्या निवडणुका 31 मार्च 2021 पर्यंत पुढे ढकलण्यात आल्या होत्या. मात्र राज्यात कोरोनाची स्थिती पुन्हा वाढल्याने पाच वर्षांच्या मुदती संपूनही राज्यातील कोणत्याच निवडणुका झाल्या नाहीत.
ग्रामपंचायतीवर प्रशासक नेमण्यात आले होते. मात्र कोरोनाचा प्रभाव कमी होताच ग्रामपंचायतीच्या निवडणुका घेण्यात आल्या. त्याचबरोबर काही राज्यांमधे विधान परिषद निवडणुकाही पार पडल्या आहेत. त्याचबरोबर सद्यस्थितीत काही राज्यांमध्ये विधानसभा निवडणुका सुरू आहेत. तसेच राज्यातील लोकप्रतिनिधी तसेच सहकारी संस्थांच्या पदाधिकाऱयांनी सहकारी संस्थांची निवडणूक प्रक्रिया सुरू करण्याबाबत विनंती केली होती. या सर्वांचा विचार करून राज्यातील सहकारी संस्थांच्या निवडणुका तात्काळ सुरू करणे आवश्यक आहे. त्यामुळे 16 जानेवारी 2021 चे आदेश रद्द करून ज्या टप्प्यावर सहकारी संस्थांच्या निवडणुका स्थगित करण्यात आल्या आहेत, त्या टप्प्यापासून शासनाच्या कोविड-19 संदर्भातील मार्गदर्शक सूचनांचे काटेकोरपणे पालन करून राज्यातील सहकारी संस्थांच्या निवडणुका घेण्याबाबतची कारवाई तात्काळ सुरू करण्यात यावी, असे आदेश सहकार पणन व वस्त्राsद्योग विभाग यांच्यावतीने काढण्यात आले होते. मात्र राज्यात पुन्हा कोरोनाचे रुग्ण वाढू लागल्याने राज्य शासनाने या निवडणुकांना पुन्हा 31 मार्चपर्यंत मुदतवाढ दिली होती. आता ही मुदतवाढ अजून तब्बल पाच महिन्यांनी पुन्हा वाढविण्यात आली असून या निवडणुका आता 31 ऑगस्टपर्यंत पुढे ढकलण्यात आल्या आहेत.
जिल्हय़ात एकूण 775 संस्था
सिंधुदुर्ग जिल्हय़ात एकूण 775 एवढय़ा सहकारी संस्था आहेत. यामध्ये सर्वात महत्वाची सिंधुदुर्ग जिल्हा मध्यवर्ती सहकारी बँक, कृषी उत्पन्न बाजार समिती, शिक्षक पतसंस्था आदींचा समावेश आहे. सिंधुदुर्ग जिल्हा मध्यवर्ती सहकारी बँकेच्या संचालक मंडळाची पाच वर्षांची मुदत मे 2020 मध्ये संपली आहे.
