आयएमईआर कॉलेजमध्ये ‘अचिव्हर्स डे’ साजरा

बेळगाव : केएलएस सोसायटीच्या आयएमईआर कॉलेजमध्ये ‘अचिव्हर्स डे’ साजरा करण्यात आला. प्रमुख पाहुणे म्हणून हिंदुस्थान कोका-कोला बेव्हरेजेसचे उपाध्यक्ष सुशील वैद्य उपस्थित होते. अध्यक्षस्थानी सोसायटीचे अध्यक्ष आर. एस. मुतालिक होते. प्रारंभी संचालक अतुल देशपांडे यांनी स्वागत केले. शिवप्रसाद ओगळे यांनी पाहुण्यांची ओळख करून दिली. यावेळी बोलताना सुशील वैद्य म्हणाले, गुण मिळविणे हा एक टप्पा आहे. परंतु सदैव पुढे जाणे म्हणजे यशाच्या पायरीपर्यंत पोहचणे होय. आत्मविश्वास बाळगून आव्हाने पेलण्यास समर्थ होणे आवश्यक आहे. कार्पोरेट कंपन्यांच्या अपेक्षा काय आहेत, याबद्दलही त्यांनी विवेचन केले. त्यांच्या हस्ते गुणवंत विद्यार्थ्यांचा सत्कार करण्यात आला. आर. एस. मुतालिक यांनी विद्यार्थ्यांनी कर्मचारी होण्याऐवजी मालक होण्याचा सल्ला दिला. प्रा. श्रीरंग देशपांडे यांनी वक्त्यांचा सत्कार केला. ऋतुजा आणि पूजा यांनी सूत्रसंचालन केले. दृष्टी राठोड यांनी आभार मानले.