प्रतिनिधी / सातारा
कराड तालुक्यातील रेठरे बुद्रूक, येथील विकास सेवा सोसायटीच्या खत विभागात सन २०१२ ते २०१५ या कालावधीत २३ लाख ५४ हजार ७६७ रुपयांचा अपहार झाल्याचा प्रकार उघडकीस आला आहे. पुर्नलेखा परिक्षणात हा प्रकार आढळून आल्याने खळबळ उडाली. याप्रकरणी उपलेखापरिक्षक रोहीत सुर्यवंशी यांनी करा तालुका पोलीस ठाण्यात फिर्याद दाखल केली आहे.
सुर्यवंशी यांच्या फिर्यादीवरून दिनकर सोमदे (रा. रेठरे बुद्रूक ता. कराड ) यांच्यावर गुन्हा दाखल झाला आहे. पोलिसांनी दिलेल्या माहितीनुसार, कराड तालुक्यातील रेठरे बुद्रूक येथील विकास सेवा सोसायटीच्या खत विभागात दिनकर सोमदे हे विभाग प्रमुख होते. खत विभागाचे १ एप्रिल २०१२ ते ३१ मार्च २०१५ या काळात लेखा परिक्षण करण्याचे आदेश १० नोव्हेंबर २०१७ रोजी जिल्हा उपनिबंधकांनी दिले होते. त्यानुसार उपलेखा परिक्षक रोहीत सुर्यवंशी यांनी लेखा परिक्षणाचे काम पुर्ण केले. फेर लेखा परिक्षण करताना २३ लाख ५४ हजार ७६७ रुपयांचा अपहार झाल्याचे समोर आले.
दरम्यान २०१२ ते २०१५ या कालावधीतील रोख विक्री पुस्तक ते विक्री रजिस्टर तपासणी करीत असताना ६ लाख २६ हजार ३०४ एवढी रक्कम लेखा परिक्षकांच्या निदर्शनास आली आहे. तर उधार विक्री पावती दर आणि रोख विक्री पावती दर यामध्ये तफावत आढळून आली आहे. उधार विक्री दरापेक्षा रोखीने विक्री केलेल्या पावत्या या कमी दराने काढलेल्या असून फरकाची रक्कम अपहारीत असल्याचे लेखा परिक्षकांचे म्हणणे आहे. तसेच या कालावधीतील नावे व्हाऊचर तपासणी करीत असताना निदर्शनास आलेली रक्कम १७ लाख २८ हजार ४६३ एवढी आहे. रोजकिर्दीला रोखीने वाहतूक खर्चाची बिले खर्ची पडली असून नमुद वाहतूक व्हाऊचरसोबत वाहतुकीची बिले उपलब्ध नसल्यामुळे सदरच्या फरकाची रक्कम ही अपहारीत रक्कम असल्याचे लेखा परिक्षकांनी फिर्यादीत म्हटले आहे.
