कोरोना विषाणूपासून न्यूझीलंड पूर्णपणे मुक्त

पूर्ण जग कोरोना महामारीशी झुंज देत असताना न्यूझीलंड हा देश पूर्णपणे कोरोना विषाणूपासून मुक्त झाला आहे. न्यूझीलंड सरकारने कोरोनाचा एकही उपचाराधीन रुग्ण नसल्याने सर्व निर्बंध हटविले आहेत. न्यूझीलंड आता सतर्कतेच्या पातळी-1 मध्ये पोहोचला असून देशाच्या इशारा यंत्रणेत ही नीचांकी पातळी आहे. न्यूझीलंडमध्ये आता लोकांच्या एकत्र येण्यावर कुठलेच बंधन नसणार आहे. परंतु देशाच्या सीमा अद्याप विदेशी नागरिकांसाठी बंद राहतील. न्यूझीलंडमध्ये दोन आठवडय़ांपेक्षा अधिक काळापासून एकही नवा रुग्ण सापडलेला नाही. आम्ही सुरक्षित आणि मजबूत स्थितीत आहोत. परंतु अद्याप कोरोनापूर्व स्थितीत परतणे सोपे नाही, परंतु आता प्रतिबद्धता आणि पूर्ण लक्ष आरोग्य प्रणालीऐवजी आर्थिक विकासावर असणार आहे. आमचे काम अद्याप संपलेले नाही, परंतु ही एक उत्तम कामगिरी असल्याचे कुणीच नाकारू शकत नसल्याचे उद्गार पंतप्रधान जेसिंडा आर्डर्न यांनी काढले आहेत.