सांगरूळ / प्रतिनिधी
विधान परिषदेच्या पुणे विभाग शिक्षक मतदारसंघातून प्रा. जयंत आसगावकर यांना विजयी करून विभागातील पाच जिल्ह्यातील शिक्षकांनी कोल्हापूर जिल्ह्याचा सन्मान केला आहे. प्रा. जयंत आसगावकर शिक्षण क्षेत्रातील प्रश्नांची सोडवणूक करून शिक्षकांनी टाकलेला विश्वास सार्थ ठरवतील असा विश्वास कोल्हापूरचे छत्रपती शाहू महाराज यांनी व्यक्त केला.
शिक्षक मतदारसंघाचे नूतन आमदार प्राध्यापक जयंत आसगावकर यांनी विधान परिषद निवडणुकीच्या विजयानंतर छत्रपती शाहू महाराज यांची भेट घेऊन आशीर्वाद घेतले यावेळी ते बोलत होते.यावेळी बोलताना प्रा . जयंत आसगावकर यांनी ऑल इंडिया श्री शिवाजी मेमोरियल सोसायटीचा माझ्या विजयात सिंहाचा वाटा असल्याचे सांगून संस्थेने टाकलेल्या विश्वासातून प्रेरणा घेऊन अधिकाधिक चांगले काम करण्याची ग्वाही दिली .
छत्रपती शाहू महाराज यांनी नूतन आमदार प्रा जयंत असगावकर यांचा सत्कार केला . यावेळी माजी आमदार मालोजीराजे छत्रपती यांनीही प्राध्यापक आसगावकर यांना शुभेच्छा दिल्या . यावेळी शिक्षक नेते उदय पाटील व के के पाटील ,कोजिमाशि पतसंस्थेचे संचालक समीर घोरपडे कोजिमाशि पतपेढीचे संचालक शिवाजी लोंढे ,संदीप पाटील प्रा. एस पी चौगले यांचे सह शिक्षक कार्यकर्ते उपस्थित होते .
