रत्नागिरी येथील निवासस्थानी प्रदान
प्रतिनिधी / कुडाळ:
रत्नागिरीतील जुने व नामवंत वकील आणि माजी खासदार बापूसाहेब परुळेकर यांना त्यांनी या क्षेत्रात केलेल्या गौरवास्पद कामगिरीबद्दल महाराष्ट्र-गोवा बार असोसिएशनच्यावतीने ‘दीपस्तंभ’ पुरस्कार देण्यात आला. हा पुरस्कार ऍड. परुळेकर यांना त्यांच्या निवासस्थानी प्रदान करण्यात आला.
महाराष्ट्र-गोवा बार असोसिएशनची फेब्रुवारीमध्ये नाशिक येथे राज्यस्तरीय कॉन्फरन्स झाली होती. त्यात ऍड. परुळेकर यांना त्यांच्या या क्षेत्रातील केलेल्या गौरवास्पद कामाबद्दल हा पुरस्कार जाहीर झाला होता. त्या कार्यक्रमाला परुळेकर वयोमानामुळे उपस्थित राहू न शकल्याने हा पुरस्कार महाराष्ट्र-गोवा बार असोसिएशनचे कोकणचे प्रतिनिधी संग्राम देसाई यांनी स्वीकारला होता. या पुरस्कार वितरण कार्यक्रमाला न्या. अरविंद बोबडे यांच्यासह अन्य मान्यवर उपस्थित होते. राज्याचे मंत्री छगन भुजबळ यांच्या हस्ते हा पुरस्कार देण्यात आला. रत्नागिरी येथे परुळेकर यांच्या निवासस्थानी ऍड. देसाई यांनी हा पुरस्कार व मानचिन्ह परुळेकर यांना प्रदान केले. सिंधुदुर्ग बार असोसिएशनचे अध्यक्ष उमेश सावंत, कुडाळ बार असोसिएशनचे अध्यक्ष ऍड. अमोल सामंत, रत्नागिरी बार असोसिएशनचे अध्यक्ष अशोक कदम, मुदस्सर डिंगणकर व बापूसाहेब परुळेकर यांचे सुपुत्र ऍड. बाबा परुळेकर उपस्थित होते.
