संकेश्वर पोलिसांची कारवाई, टायरसह ट्रक्टरही जप्त
प्रतिनिधी / बेळगाव
टायर चोरी प्रकरणी संकेश्वर पोलिसांनी तिघा जणांना अटक केली आहे. त्यांच्या जवळून टायर व चोरीचा टॅक्टर जप्त करण्यात आला आहे. चोरीच्या घटनेनंतर चार दिवसांत पोलिसांनी चोरटय़ांना अटक केली आहे.
संजू केंपान्ना कुरबर (वय 22), राहुल रामचंद्र बाडकर (वय 23), दुंडाप्पा सिध्दराम कुरबर (वय 30, तिघेही रा. गवनाळ, ता. हुक्केरी) अशी अटक करण्यात आलेल्या तिघा जणांची नावे आहेत. हुक्केरीचे मंडल पोलीस निरीक्षक गुरुराज कल्याणशेट्टी यांच्या मार्गदर्शनाखाली संकेश्वरचे पोलीस निरीक्षक गणपती कोंगनोळी, जी. ए. केळगडे, बी. के. नागनुरी, ए. एस. सवदी, बी. एस. कपरट्टी, एम. एम. जमगी, बी. एन. मेलमट्टी, आर. एच. राजापुरे व त्यांच्या सहकाऱयांनी ही कारवाई केली आहे.
दि. 6 ऑक्टोबर रोजी रात्री 11 वाजता गवनाळ येथे गिरीश बसगौडा पाटील (रा. जलालपूर, ता. रायबाग) यांच्या मालकीच्या मळणी मशिनची दोन टायर चोरण्यात आले होते. या संबंधी 12 ऑक्टोबर रोजी संकेश्वर पोलीस स्थानकात एफआयआर दाखल करण्यात आले होते. फिर्याद दाखल झाल्यानंतर चार दिवसांत पोलिसांनी एक ट्रक्टर, दोन टायर जप्त केले आहेत.
