छत्रपती शिवाजी महाराजांच्या अवमानाबाबत हिंदू जनजागृती समितीतर्फे निषेध
प्रतिनिधी / बेळगाव
द वायर या ऑनलाईन न्यूज पोर्टलवर क्रिस्टीन मारेवा कार्वोस्की या पत्रकार महिलेने दि. 8 ऑक्टोबर रोजीच्या लिहिलेल्या एका लेखात छत्रपती शिवाजी महाराजांचा घोर अवमान केला आहे. उत्तरप्रदेशचे मुख्यमंत्री योगी आदित्यनाथ यांनी मुघल म्युझियमचे नामांतर ‘छत्रपती शिवाजी महाराज म्युझियम’ असे करण्याची घोषणा केली. यावर टीका करणाऱया या लेखात छत्रपती शिवाजी महाराज, म्हणजे हिंदू राष्ट्रवादाच्या अतिरेकी हिंदुत्वाचे सर्वात आवडते प्रतीक असे म्हटले आहे. हे लिखाण अत्यंत निंदनीय असून हिंदू जनजागृती समिती याचा तीव्र शब्दात निषेध करते. अवघ्या हिंदू समाजाला दैवतासमान असणाऱया छत्रपती शिवाजी महाराजांचा अवमान करणाऱया द वायर या न्यूज पोर्टलचे संपादक, मालक व पत्रकारांवर तात्काळ गुन्हा दाखल करावा, अशी मागणी हिंदू जनजागृती समितीचे राष्ट्रीय प्रवक्ते रमेश शिंदे यांनी केली.
शिंदे यांनी सांगितले की, या विरोधात मुंबईत विक्रोळी येथे प्रभाकर भोसले यांनी तर अमरावती येथे रोशन मुळे यांनी, रायगड येथे रोहिदास शेडगे यांनी पोलिसात तक्रारी केल्या आहेत. तक्रारीत द वायरचे संपादक सिद्धार्थ वरदराजन, सिद्धार्थ भाटीया, एम. के. वेणू व लेखिका मारेवा कार्वोस्की यांच्या विरोधात भारतीय दंडसंहिता कलम 153 अ, 295 अ आणि 34 प्रमाणे गुन्हा नोंद करावा आणि आरोपींना त्वरित अटक करावी, असे म्हटले आहे.
सिद्धार्थ वरदराजन यांनी अखिल हिंदू समाजाची जाहीर माफी प्रसिद्ध करावी. अन्यथा या प्रकरणी न्यायालयामध्ये खेचू, असा इशारा शिंदे यांनी दिला आहे.
