प्रतिनिधी / शाहुवाडी
कोल्हापूर- रत्नागिरी रोडवरील चांदोली ता. शाहूवाडी गावच्या हद्दीतील धरणाचा ओढा नावाच्या मोरीजवळ मलकापूर हून आंब्याकडे भरधाव वेगाने निघालेल्या एम. एच. ०९,९३२५ या आल्टो सारख्या दिसणा-या पांढ-या रंगाच्या चारचाकी ने पायी चालत निघालेल्या शुभांगी सुरेश पाटील वय २८ रा. चांदोली या महिलेस व मुलगा पियुष वय १२ वर्षे या दोघांना पाठी मागून धडक देऊन झालेल्या अपघातात शुभांगी पाटील हिच्या डोकीस गंभीर मार लागून तिच्या नाका तोंडातून रक्त येऊन ती बेशुध्द पडली होती. व मुलगा पियुष च्या डोकीस मार लागला.
चालकांने गाडीसह आंब्याच्या दिशेने पलायन केले. जखमींवर प्राथमिक उपचार मलकापूर ग्रामीण रुग्णालयात करून पुढील उपचारांसाठी कोल्हापूरातील शासकीय रुग्णालयात पाठवण्यात आले. मात्र तेथे उपचार न मिळाल्याने अखेर मलकापूर ग्रामीण रूग्णालयात उपचार सुरु असताना तिचा मृत्यू झाला. तिच्या पश्चात पती, मुलगा व मुलगी असा परिवार आहे. हा अपघात शुक्रवार दिनांक. २ आक्टोबर रोजी झाला असून आज रात्री उशीरा या अपघाताची नोंद शाहूवाडी पोलिसात झाली आहे. मृत महिलेवर चांदोली गावी शोकाकुल वातावरणात अंत्यविधी करण्यात आला.भरधाव वेगाने व निष्काजीने वाहन चालवून महिलेच्या मृत्यूस कारणीभूत ठरलेल्या अज्ञात चालकाविरूध्द शाहूवाडी पोलिसात गुन्हा नोंद झाला आहे.
गाडीचा शोध लागणार कसा
कोल्हापूर-रत्नागिरी महामार्गावरील चांदोली नजीक यापूर्वीही अशाच एका अज्ञात वाहनाच्या धडकेत एकाला जीव गमवावा लागला होता आता पुन्हा ही तीच वेळ एका महिलेवर आल्याने अशा गाडीचा शोध लागणार कसा व या बेदरकार वाहन धारकांना आवर घालणार कोण अशी चर्चा जोर धरू लागली आहे.
