राजापूर / वार्ताहर
वाहाळत खेकडे पकडत असताना पाण्यात पडलेल्या विजवाहिनीच धक्का बसून पिता पुत्राचा मृत्यू झाल्याची दुर्दैवी घटना राजापूर तालुक्यातील नाणार गावी घडली आहे. दिवाकर पुजारी (४२) व अथर्व पुजारी (१०) अशी मयत व्यक्तींची नावे आहेत.
शुक्रवारी सायंकाळी 7 वाजण्याच्या सुमारास दिवाकर पुजारी हे आपल्या 10 वर्षाच्या मुलासह गावातील ओढ्यावर खेकडे पकडण्यासाठी गेले होते. याच ओढ्यावरून महावितरणची 11 केव्ही विजवाहिनी गेलेली आहे. या वाहिनीचा कंडक्टर तुटल्याने प्रवाहित विजवाहिनी ओढ्याच्या पाण्यात पडली होती. दुर्दैवाने पुजारी पितापुत्र याच ठिकाणी खेकडे पकडण्यासाठी गेले असता दोघांनाही विजेचा जबर धक्का बसून त्यातच दोघांचाही मृत्यू झाला..
या घटनेची खबर मिळताच महावितरणचे अधिकारी घटनास्थळी दाखल झाले. रात्री उशिरापर्यंत या घटनेचा पंचनामा करण्याचे काम सुरू होते.
