ऑनलाईन टीम / मुंबई :
देशात दिवसेंदिवस कोरोनाचा प्रादुर्भाव वाढत असतानाच महाराष्ट्रातून सलग तिसऱ्या दिवशी एक दिलासादायक बाब समोर आली आहे. राज्यात मागील 24 तासात 20,206 रुग्ण कोरोनामुक्त झाले आहेत. राज्यात आतापर्यंत 9 लाख 36 हजार 554 रुग्ण कोरोनामुक्त झाले असून, त्यांना डिस्चार्ज देण्यात आला आहे. राज्यातील कोरोना रुग्ण बरे होण्याचे प्रमाण सध्या 75.36 % आहे.
दरम्यान, मागील 24 तासात राज्यात 18,390 नवे कोरोनाबाधित रुग्ण आढळले. त्यामुळे राज्यातील एकूण कोरोनाबाधितांची संख्या 12 लाख 42 हजार 770 वर पोहचली आहे. सध्या 2 लाख 72 हजार 410 रुग्ण उपचार घेत आहेत. मंगळवारी दिवसभरात 392 कोरोनाबाधितांचा मृत्यू झाला. तर मृतांचा एकूण आकडा 33 हजार 407 एवढा आहे. सध्या राज्यातील मृत्यू दर 2.69 % आहे.
प्रयोगशाळेत आतापर्यंत तपासणीसाठी पाठविण्यात आलेल्या 60 लाख 17 हजार 284 नमुन्यांपैकी 12 लाख 42 हजार 770 रुग्णांचे रिपोर्ट पॉझिटिव्ह आले आहेत. सध्या राज्यात 18 लाख 70 हजार 200 लोक होम क्वारंटाईनमध्ये असून, 34 हजार 982 लोक संस्थात्मक क्वारंटाईनमध्ये आहेत.
- शहरे कोरोनामुक्त रुग्ण संख्या
- मुंबई : 1,52,204
- ठाणे : 1,40,141
- पुणे : 2,01,876
- नागपूर : 46,043
- सिंधुदुर्ग : 1820
