वार्ताहर / पालगड
दापोली तालुक्यातील पालगड येथे भरदुपारी घरफोडी करणाऱ्या दोघांना ग्रामस्थांनी पकडून चांगला चोप दिला. यानंतर त्यांना पोलिसांच्या ताब्यात देण्यात आले. हा प्रकार रविवारी दुपारी घडला.
पालगड एसटी स्टँड जवळ एक घर बंद असते. या बंद घरावर या दोघांनी पाळत ठेवली. दुपारच्या ग्रामस्थांच्या विश्रांतीच्या वेळी या दोघांनी सदर घर फोडून चोरीच्या उद्देशाने घरात प्रवेश केला. मात्र बंद घरांमध्ये हालचाल दिसून आल्याने ग्रामस्थांनी सतर्क होऊन पाहिले असता आत मध्ये दोन चोर आढळून आले. त्या दोघांनाही ग्रामस्थांनी पकडून चांगला चोप दिला. मात्र या गदारोळात एक चोर जंगलात पळून जाण्यात यशस्वी झाला. दुसऱ्याला ग्रामस्थांनी पकडून पोलिसांच्या ताब्यात दिले. भरदुपारी घडलेल्या या प्रकरणाने पालगड परिसरात खळबळ उडाली आहे.
