ऑनलाईन टीम / नाशिक :
नाशिक जिल्ह्याच्या इगतपुरीमधील एका गावाला दिवंगत बॉलिवूड अभिनेता इरफान खानचे नाव देण्यात आले आहे. इरफानवरील प्रेमापोटी गावकऱ्यांनी गावाचे नाव बदलल्याचे सांगण्यात येते.
बॉलिवूडमधील दिग्गज अभिनेत्यांनपैंकी इरफान एक होता. इगतपुरीमधील ‘पत्र्याचीवाडी’ या गावात त्याचे एक छोटेसे फार्महाऊस होते. शुटिंगमधून जेव्हा वेळ मिळेल तेव्हा तो या फार्महाऊसवर यायचा. फार्महाऊसवर आल्यावर तो नेहमीच गावात चक्कर मारत असे. इरफान एक दानशूर व्यक्तिमत्त्व असल्याने तो नेहमीच गावातील शाळा आणि विद्यार्थ्यांना लागणारे शैक्षणिक साहित्य पुरवायचा. तसेच गावातील गरीब जनतेशी मनमोकळ्या गप्पा मारुन त्यांच्या अडचणी समजून घ्यायचा. त्यांनाही तो मदत करायचा.
त्यामुळे गावकऱ्यांनी इरफानवरील प्रेमापोटी आणि त्याच्या आठवणींना उजाळा देण्यासाठी गावाचे ‘पत्र्याची वाडी’ हे नाव बदलून ‘हिरोची वाडी’ असे नाव दिले आहे. त्यामुळे हे गाव आता ‘हिरोची वाडी’ म्हणून ओळखले जाईल.
