चौथा टी 20 सामना जिंकत टीम इंडियाची मालिकेत 2-1 ने आघाडी : अक्षर पटेल सामनावीर : वॉशिंग्टन सुंदरचे 3 बळी
वृत्तसंस्था/गोल्डकोस्ट
येथील कॅराराच्या मैदानात कांगारुंची शिकार करत 5 सामन्यांच्या टी -20 मालिकेत भारतीय संघाने 2-1 अशी आघाडी घेतली आहे. पहिल्यांदा फलंदाजी करताना भारतीय संघाने 167 धावा करत यजमान ऑस्ट्रेलियासमोर 168 धावांचे टार्गेट सेट केले होते. या धावसंख्येचा पाठलाग करताना ऑस्ट्रेलियन संघ 119 धावांत ऑलआऊट झाला. भारतीय संघाने 48 धावांनी सामना जिंकत सलग दुस्रया विजयासह मालिकेत आघाडी घेतली आहे. उभय संघातील पाचवा व शेवटचा सामना दि. 8 नोव्हेंबर रोजी ब्रिस्बेन येथे होईल. सामन्यात अष्टपैलू खेळी साकारणाऱ्या अक्षर पटेलला सामनावी पुरस्काराने गौरवण्यात आले. गोल्ड कोस्ट येथील कॅराराच्या मैदानात भारतीय संघ प्रथमच आंतरराष्ट्रीय सामना खेळण्यासाठी मैदानात उतरला.
शुभमन गिल आणि अभिषेक शर्मा या जोडीने टीम इंडियाच्या डावाची सुरुवात केली. अभिषेक शर्मा 21 चेंडूत 28 धावा करून परतल्यावर शुभमन गिलने 39 चेंडूत4 चौकार आणि 1 षटकारासह 46 धावांची उपयुक्त आणि सर्वोच्च खेळी केली. शिवम दुबेने 22 धावांचे योगदान दिले. याशिवाय, कर्णधार सूर्यकुमार यादवने 10 चेंडूत 2 षटकारासह 20 धावा फटकावल्या. सूर्या बाद झाल्यानंतर भारतीय संघाचे 4 गडी केवळ 15 धावांच्या अंतराने गमावले. अखेरच्या षटकात अष्टपैलू अक्षर पटेलने मात्र जबरदस्त फलंदाजी करत संघाला सावरले. मार्कसNस्टॉइनिसच्या पहिल्याच चेंडूवर चौकार आणि पुढच्या चेंडूवर षटकार ठोकत त्याने 11 चेंडूंमध्ये 21 झटपट धावा केल्या. यामुळे भारतीय संघाला निर्धारित 20 षटकात 8 बाद 167 धावापर्यंत मजल मारता आली. ऑस्ट्रेलियाकडून नॅथन एलिस आणि अॅडम झम्पाने सर्वाधिक 3 गडी बाद केले.
कांगारुंची सुरुवात धमाकेदार पण शेवट खराब
168 धावांचा पाठलाग करताना ऑस्ट्रेलियाच्या डावाची सुरुवात मॅथ्यू शॉर्ट आणि मिचेल मार्श यांनी केली. दोघांनीही दमदार सुरुवात करून संघाला चांगली सुरूवात मिळवून दिली. मात्र, पाचव्या षटकात अक्षर पटेलने शॉर्टला बाद करून भारताला पहिले यश मिळवून दिले. शॉर्टने 2 चौकार आणि 2 षटकारासह 25 धावा केल्या. तर 9 व्या षटकात अक्षरने पुन्हा एकदा धक्का दिला आणि इंग्लिशला माघारी पाठवले. इंग्लिशला केवळ 12 धावा करता आल्या. यानंतर शिवम दुबेने कर्णधार मिचेल मार्श आऊट केले. मार्श 30 धावा करून बाद झाला. मग बाराव्या षटकात दुबेने टिम डेव्हिडलाही तंबूचा रस्ता दाखवला.
टिम डेव्हिड फक्त 14 धावा करून पॅव्हेलियनमध्ये परतला. यानंतर 14 व्या षटकात अर्शदीप सिंगने फिलिपला माघारी धाडले. तर 15 व्या षटकात वरुणने ऑस्ट्रेलियाला सहावा धक्का दिला आणि मॅक्सवेलला बाद केले. त्यानंतर सुंदरने स्टोइनिसला आणि पुढच्याच चेंडूवर त्याने बार्टलेटलाही बाद केले, यासोबत सुंदरने शेवटचीही विकेट घेतली. यामुळे ऑस्ट्रेलियाचा संघ 18.2 षटकांत 119 धावांत ऑलआऊट झाला. भारताकडून वॉशिंग्टन सुंदरने 3 धावांत 3 विकेट्स घेतल्या. अक्षर पटेल आणि शिवम दुबे यांनी प्रत्येकी दोघांना माघारी पाठवले. बुमराह, वरुण चक्रवर्ती आणि अर्शदीप सिंगने प्रत्येकी एक बळी घेतला.
शिवम दुबेचा 117 मी लांब षटकार
चौथ्या टी 20 सामन्यातील ऑस्ट्रेलियाविरुद्ध 11 व्या षटकात शिवम दुबेने अॅडम झम्पाच्या चेंडूवर 117 मीटर लांबीचा षटकार मारला. त्याच्या षटकारामुळे चेंडू हरवला आणि पंचांना दुसरा चेंडू मागवावा लागला. दुबेने झम्पाच्या ऑफ स्टंपच्या बाहेर चेंडू मारला आणि तो साईटक्रीनवर उडाला. त्यानंतर तिसऊrप् पंचांनी दुसरा चेंडू मागवला. दुबेच्या या षटकाराचा व्हिडिओ सोशल मीडियावर चांगलाच व्हायरल झाला आहे.
संक्षिप्त धावफलक
भारत 20 षटकांत 8 बाद 167 (अभिषेक शर्मा 28, शुभमन गिल 46, शिवम दुबे 22, सूर्यकुमार यादव 20, अक्षर पटेल 11 चेंडूत नाबाद 21, नॅथन एलिस आणि झाम्पा प्रत्येकी 3 बळी) ऑस्ट्रेलिया 18.2 षटकांत सर्वबाद 119 (मिचेल मार्श 30, मॅथ्यू शॉर्ट 25, टीम डेव्हिड 14, स्टोइनिस 17, वॉशिंग्टन सुंदर 3 धावांत 3 बळी, अक्षर पटेल आणि शिवम दुबे प्रत्येकी 2 बळी).
