सरदार्स हायस्कूलमध्ये रोबोटिक लॅबचे उद्घाटन

बेळगाव : सरदार्स हायस्कूल येथे नव्याने सुरू करण्यात आलेल्या अॅडव्हान्स लर्निंग रोबोटिक अँड लँग्वेज लॅबचे नुकतेच उद्घाटन करण्यात आले. आमदार असिफ सेठ यांच्या हस्ते या नव्या लॅबचे उद्घाटन करून ही लॅब विद्यार्थ्यांसाठी खुली करण्यात आली. यामुळे विद्यार्थ्यांना रोबोटिक तंत्रज्ञानाचे शिक्षण घेणे सोयीचे होणार आहे. शिक्षणामध्ये अनेक नवीन बदल होत असून विद्यार्थ्यांना शालेय वयापासूनच रोबोटिक कोडिंग अँड लिंग्विस्टिक डेव्हलपमेंटची माहिती मिळावी. तसेच त्यांना स्वयंरोजगार करता यावा, यासाठी नवीन प्रयोगशाळा तयार करण्यात आली आहे. खासगीप्रमाणेच सरकारी शाळांमध्येही नवीन कौशल्ये आत्मसात करता यावीत, यासाठी हा उपक्रम राबविल्याचे आमदार सेठ यांनी सांगितले. यावेळी गटशिक्षणाधिकारी रवी बजंत्री यांच्यासह सरदार्स शाळेचे मुख्याध्यापक व शिक्षक उपस्थित होते. त्याचबरोबर वैभवनगर येथील सरकारी शाळेमध्ये पेव्हर्स बसविण्याच्या कामाला आमदारांच्या हस्ते सुरुवात झाली. पावसाळ्याच्या दिवसात विद्यार्थ्यांना चिखलातून ये-जा करावी लागत असल्याने पेव्हर्स बसवून त्यांना रस्ता करण्यात आला. यावेळी युवा नेते अमन सेठ यांच्यासह शिक्षक उपस्थित होते.