काँग्रेसकडून भाजपचा निषेध

पणजी : भाजपतर्फे राजधानी पणजीतून काढण्यात आलेल्या मोर्चावेळी काँग्रेस कार्यालयाबाहेर मुख्य रस्त्यावर असलेल्या पक्षाच्या फलकावर शाई फेकण्यात आली म्हणून काँग्रेसतर्फे भाजपचा निषेध नोंदवण्यात आला आहे. या प्रकरणी लवकरच पोलिस तक्रार करण्यात येणार असल्याची माहिती गोवा प्रदेश काँग्रेस अध्यक्ष अमित पाटकर यांनी दिली. पणजीत घेतलेल्या पत्रकार परिषदेत पाटकर यांनी सांगितले की, काँग्रेस हा राष्ट्रीय पक्ष असून या पक्षाच्या फलकावर शाई फेकणे हे भाजपला शोभत नाही. यापूर्वी भाजपने देखील काँग्रेस नेत्यांवर विविध आरोप केले. शिंतोडे उडवले परंतु आम्ही त्याच्या बदल्यात शाई फेकण्यासारखी लज्जास्पद कृती केली नाही. या प्रकारातून भाजपने स्वत:चे हसे करुन घेतले असून जनतेनेही त्याची दखल घेतली आहे. त्याचे परिणाम लवकरच दिसतील, असेही पाटकर म्हणाले.