सरकारकडून प्रयत्न होत असल्याचे संकेत : खरेदीदारांना लाभ
वृत्तसंस्था/ नवी दिल्ली
15 ऑगस्टच्या निमित्ताने पंतप्रधान नरेंद्र मोदी यांनी त्यांच्या भाषणात अनेक घोषणा केल्या ज्यात जीएसटी कपातीचीही होती. वस्तू आणि सेवा कर म्हणजेच जीएसटीमध्ये बदल करण्याचे संकेत त्यांनी दिले. सरकार लहान कारवरील जीएसटी दर कमी करण्याची तयारी करत आहे. सध्या कारवर 28 टक्के जीएसटी आणि सेस आकारला जातो, परंतु नवीन बदलांनंतर, सरकार लहान कारवरील जीएसटी दर 18 टक्के करू शकण्याची शक्यता सांगितली जात आहे. दिवाळीच्या आसपास हा नवीन बदल लागू होऊ शकतो. अशा प्रकारे, लहान कार खरेदी करू इच्छिणाऱ्या लोकांसाठी कार खरेदी करणे स्वस्त होणार आहे.
कारवरील जीएसटी कमी केल्यास?
जर सरकारने कारवरील जीएसटी 28 टक्क्यांवरून 18 टक्के केला तर कारची किंमत लक्षणीयरीत्या कमी होईल. लहान कार खरेदी करणाऱ्यांना मोठा फायदा होईल. उदाहरणार्थ, समजा कारची एक्स-फॅक्टरी किंमत 6 लाख रुपये आहे. 6 लाख रुपयांपर्यंत 28 टक्के जीएसटी आणि 1 टक्के सेस आकारला जातो. यात, एकूण कर 29 टक्के आहे, त्यानंतर कारची किंमत सुमारे 7,74,000 रुपये होते. जर जीएसटी 18 टक्क्यांपर्यंत कमी केला तर त्याच कारची किंमत 7,08,000 रुपयांपर्यंत कमी होईल.
कार कर्जावर देखील सवलत
कारवरील जीएसटी कमी केल्याने कारच्या किमती कमी होतील, ज्यामुळे कार लोन घेणाऱ्या लोकांना देखील मदत होईल. मूळ रक्कम कमी झाल्यामुळे व्याज देखील कमी होईल आणि मासिक ईएमआय देखील आपसुकच कमी होईल.
