अवधुत गुप्ते यांची संगीत भजन स्पर्धेस सदिच्छा भेट

बेळगाव : बेळगाव येथे 178 वर्षांची परंपरा असलेल्या सार्वजनिक वाचनालयाने संगीत भजन स्पर्धा आयोजित केली आहे. अवधुत गुप्ते हे बेळगावला आले असताना त्यांनी वाचनालयाच्यावतीने करण्यात आलेल्या विनंतीस मान देऊन मराठा मंदिर येथे सुरू असलेल्या संगीत भजन स्पर्धेस सोमवारी सायंकाळी सदिच्छा भेट दिली. यावेळी उपस्थित रसिकांनी व्यक्त केलेल्या इच्छेखातर त्यांनी ‘जिथं तिथं रूप तुझं दिसू लागलं, देवा तुझ्या नावाचं याड लागलं’ हा अभंगही सादर केला. याला रसिकांचा उत्स्फूर्त प्रतिसाद मिळाला. तसेच अभंग सादर केलेल्या संघाचे त्यांनी कौतुक केले. वाचनालयाचे उपाध्यक्ष डॉ. विनोद गायकवाड यांनी प्रास्ताविक करून अवधुत गुप्ते यांचा परिचय करून दिला. वाचनालयाचे अध्यक्ष अनंत लाड यांनी त्यांचे स्वागत करून त्यांचा वाचनालयाच्यावतीने स्मृतिचिन्ह देऊन सन्मान केला. याप्रसंगी वाचनालयाच्या कार्यवाह सुनीता मोहिते, संचालक अभय याळगी, प्रसन्न हेरेकर, व्यवस्थापक विठ्ठल कडगावकर यांच्यासह मान्यवर, रसिक उपस्थित होते.