18 ऑगस्टला बैठक : खर्गे करणार ‘इंडिया’तील नेत्यांशी चर्चा
वृत्तसंस्था/नवी दिल्ली
उपराष्ट्रपतिपदाच्या उमेदवारावर चर्चा करण्यासाठी विरोधी आघाडी ‘इंडिया’चे नेते 18 ऑगस्ट रोजी भेटू शकतात. राज्यसभेतील विरोधी पक्षनेते आणि काँग्रेस अध्यक्ष मल्लिकार्जुन खर्गे इंडिया ब्लॉकच्या सर्वोच्च नेतृत्वाशी चर्चा करत आहेत. उपराष्ट्रपतिपदाच्या निवडणुकीसाठी 9 सप्टेंबर रोजी मतदान होणार असून त्याच दिवशी मतमोजणीही होईल. उपराष्ट्रपतिपदासाठी उमेदवारी अर्ज दाखल करण्याची शेवटची तारीख 21 ऑगस्ट आहे. 25 ऑगस्टपर्यंत उमेदवारी मागे घेता येईल. जगदीप धनखड यांनी 21 जुलैच्या रात्री अचानक देशाच्या 14 व्या उपराष्ट्रपतिपदाचा राजीनामा दिल्यामुळे ही निवडणूक होत आहे.
74 वर्षीय धनखड यांचा कार्यकाळ 10 ऑगस्ट 2027 पर्यंत होता. भाजपकडून थावरचंद गेहलोत हे सर्वात प्रबळ दावेदार असल्याचे मानले जात आहे. भाजप या पदासाठी आपल्या विचारसरणीला समर्पित कार्यकर्त्याला उभे करू शकते. सध्या पक्षात सुरू असलेल्या नावांमध्ये कर्नाटकचे राज्यपाल थावरचंद गेहलोत हे सर्वात प्रबळ दावेदार मानले जातात. दुसरे नाव सिक्कीमचे राज्यपाल ओम माथूर यांचे आहे. मात्र, पंतप्रधान नरेंद्र मोदी यांच्याकडून ऐनवेळी धक्कादायक नाव जाहीर होण्याची शक्यताही नाकारता येत नाही.
संसदेत एनडीएकडे बहुमत
लोकसभेतील एकूण 542 सदस्यांपैकी एनडीएकडे 293 आणि विरोधी आघाडीकडे 234 सदस्य आहेत. राज्यसभेतील 240 सदस्यांपैकी एनडीएला सुमारे 130 आणि विरोधी आघाडीला 79 खासदारांचा पाठिंबा आहे. एकूणच, एनडीएला 423 आणि विरोधी आघाडीला 313 खासदारांचा पाठिंबा आहे. उर्वरित सदस्य कोणत्याही गटाशी संबंधित नसले तरी त्यांचे मत सत्ताधारी आघाडीच्या बाजूने पडू शकते. साहजिकच सत्ताधारी गटाने दिलेला उमेदवारच उपराष्ट्रपती म्हणून निवडून येणे क्रमप्राप्त आहे.
