बालविवाह प्रकरणी न्यायालयात दोषारोप दाखल

बेळगाव : अल्पवयीन मुलीच्या आधारकार्डमधील जन्म तारखेत फेरफार करून तिचे लग्न करून दिल्याप्रकरणी ऐगळी पोलीस स्थानकात आठ जणांविरोधात गुन्हा दाखल झाला होता. याप्रकरणी ऐगळीच्या पोलीस निरीक्षकांनी तपास करून नागरी हक्क संचालनालयाचे जिल्हा पोलीसप्रमुख रविंद्र गडादीसह आठ जणांविरोधात न्यायालयात दोषारोप दाखल केले आहे. त्यामुळे खटल्याची सुनावणी सुरू होणार आहे. राजेंद्र सिद्धाप्पा गडादी, सिद्धाप्पा कल्लाप्पा गडादी, नकुशा सिद्धाप्पा गडादी, शिवाप्पा चंद्राम होसमनी, सविता शिवाप्पा होसमनी, ऋतुजा सिद्धाप्पा गडादी, रविंद्र काशिनाथ गडादी व वर्षा रविंद्र गडादी अशी संशयितांची नावे आहेत. ऐगळी पोलीस स्थानकाच्या हद्दीत येणाऱ्या एका गावातील 16 वर्षीय अल्पवयीन मुलीचा राजेंद्र गडादी याच्यासोबत विवाह करून दिला. तत्पूर्वी मुलीच्या आधारकार्डमधील जन्म तारखेत फेरफार करण्यात आला होता. याप्रकरणी मुलीच्या पालकांनी ऐगळी पोलीस स्थानकात फिर्याद दिल्याने पोलिसांनी पोक्सो, तसेच बालविवाह कायद्याअंतर्गत गुन्हा दाखल करून घेतला होता. याप्रकरणाचा तपास करून पोलिसांनी न्यायालयात दोषारोप दाखल केला आहे.