भगवान महावीर जन्मकल्याण उत्सव संघातर्फे जिल्हाधिकाऱ्यांना निवेदन

बेळगाव : शिरोली तालुक्यातील नांदणी मठातील महादेवी हत्तीणीची जामनगर येथील वनतारा वन्यजीव प्रकल्पात रवानगी करण्यात आली आहे. यामुळे जनआक्रोश निर्माण झाला आहे. महादेवीला नांदणी मठात परत आणण्यासाठी हजारोंचा जनसमुदाय एकवटला आहे. याची दखल घेऊन वनतारात असलेली महादेवी पुन्हा नांदणी मठात परत आणावी, अशी मागणी शहरातील भगवान महावीर जन्मकल्याण उत्सव संघाच्यावतीने करण्यात आली. नांदणी मठात महादेवीची योग्यरित्या दखल घेण्यात येते. वेळोवेळी डॉक्टरही तिची तपासणी करून उपचार करतात. नांदणीतील नागरिकांच्या मनात महादेवीबद्दल  आदर आहे. प्रत्येक सण, उत्सव, यात्रांमध्ये महादेवीचा सहभाग नित्याचाच असायचा. यामुळे महादेवीसोबत नागरिकांचे ऋणानुबंध जोडले गेले होते. नांदणीमठात महादेवीचे योग्य संगोपन होत असून तिची पुन्हा मठात रवानगी करावी, अशी मागणी करण्यात आली. यावेळी राजेंद्र जैन, सचिन पत्रावळी, पद्मप्रसाद, अवधूत तुडवेकर, निलेश हिरदोळी आदी उपस्थित होते.