गुंजीनजीक राष्ट्रीय महामार्गावर खड्ड्यांचे साम्राज्य : प्रवाशांतून नाराजी

गुंजी : गेल्या अनेक वर्षापासून बेळगाव-पणजी रस्त्याचे काम सुरू असून सध्या गुंजी ते अनमोड या दरम्यान या महामार्गाचे काम अद्याप ठिकठिकाणी शिल्लक आहे. त्यामुळे गुंजीजवळ संगरगाळी क्रॉसवर काम शिल्लक असलेल्या रस्त्यावर महामार्गाच्या कंत्राटदाराने रस्ता सुधारण्याकडे साफ दुर्लक्ष केल्याने या ठिकाणी या मार्गावर खड्ड्यांचे साम्राज्य पसरले आहे. त्यामुळे प्रवासी आणि वाहनचालकांतून नाराजी व्यक्त केली जात आहे. गेल्या अनेक दिवसापासून या ठिकाणी पडलेल्या खड्ड्यांमुळे रस्त्याची चाळण झाली असून या मार्गावरून जात असताना वाहनचालकांना खड्डे चुकविण्यासाठी तारेवरची कसरत करावी लागत आहे. त्याचबरोबर सदर खड्डे खोल असल्याने आणि या खड्ड्यांमध्ये तुडुंब पाणी भरल्याने खड्ड्यांचा अंदाज येणे मुश्किल होत आहे. त्यामुळे या ठिकाणाहून चारचाकी आणि दुचाकी वाहनांना येथून रस्ता पार करत असताना मोठी कसरत करावी लागत असून कैकवेळा खड्डे चुकविताना अपघात घडण्याची शक्यता वर्तविण्यात येत आहे. यापूर्वी या ठिकाणी रात्रीच्या वेळी दुचाकीधारक खड्ड्यात पडून अपघात घडल्याने किरकोळ जखमी झाल्याची घटना घडली आहे. पुन्हा अशा घटना घडण्यापूर्वी सदर रस्त्याची डागडुजी करण्याची गरज आहे. तरी संबंधितांनी या वृत्ताची दखल घेऊन त्या ठिकाणचा रस्ता त्वरित दुरुस्त करावा आणि प्रवासीवर्गाला दिलासा द्यावा, अशी आग्रही मागणी होत आहे.