जागतिक बाजारातील संकेताचा परिणाम : निफ्टीचीही पडझड
वृत्तसंस्था / मुंबई
जागतिक बाजारातील नकारात्मक संकेतांमुळे शुक्रवारी आठवड्याच्या शेवटच्या ट्रेडिंग सत्रात भारतीय शेअर बाजार घसरणीसह बंद झाला. 1 ऑगस्टच्या अंतिम मुदतीपूर्वी भारत-अमेरिका व्यापार कराराबद्दल अनिश्चिततेचा बाजारातील कामगिरीवर परिणाम झाला. त्याच वेळी, तिमाही निकालांनंतर निवडक शेअर्समध्ये घसरण झाल्यामुळे बाजारही खाली घसरला..
बीएसई सेन्सेक्स 366 अंकांनी घसरून 81,818 वर उघडला. नंतर, निर्देशांकातील घसरण आणखी वाढली. तो अखेर 721.08 अंकांनी घसरून निर्देशांक 81,463.09 वर बंद झाला. दुसऱ्या बाजूला राष्ट्रीय शेअर बाजाराचा निफ्टी अखेर 225.10 अंकांनी घसरून 24,837.00 वर बंद झाला. सेन्सेक्स कंपन्यांमध्ये, बजाज फायनान्स, पॉवरग्रिड, इन्फोसिस, टेक महिंद्रा, बजाज फिनसर्व्ह, ट्रेंट, टाटा मोटर्स, एनटीपीसी, टाटा स्टील, मारुती, अदानी पोर्ट्स, एसबीआय, एल अँड टी आणि हिंदुस्थान युनिलिव्हर या कंपन्यांचे समभाग प्रमुख घसरणीत राहिले. दुसरीकडे, फक्त सन फार्मा आणि भारती एअरटेल हे आघाडीवर राहण्यात यशस्वी झाले. निफ्टी मिडकॅप निर्देशांक 1.61 टक्के आणि निफ्टी स्मॉलकॅप निर्देशांक 2.1 टक्क्यांनी घसरला.
क्षेत्रीय आघाडीवर, निफ्टी फार्मा वगळता सर्व क्षेत्रांमध्ये विक्री दिसून आली. निफ्टी ऑटो 1.27 टक्के, निफ्टी आयटी 1.42 टक्के, निफ्टी मेटल 1.64 टक्के, निफ्टी रिअॅल्टी 0.99 टक्के, निफ्टी फायनान्शियल सर्व्हिसेस 0.91 टक्के आणि निफ्टी एफएमसीजी 0.9 टक्क्यांनी घसरून बंद झाले.
घसरणीचे कारण?
-भारताने ब्रिटनसोबत मुक्त व्यापार करारावर स्वाक्षरी केली आहे. तथापि, बाजाराचे लक्ष पूर्णपणे भारत आणि अमेरिका यांच्यातील संभाव्य व्यापार करारावर आहे. -आयटी आणि एफएमसीजी स्टॉकमध्ये घसरण प्रमुख कंपन्यांच्या निराशाजनक तिमाही निकालांनंतर आयटी क्षेत्राने यापूर्वी बाजाराला धक्का दिला होता.
